Kwah ka MoRT ban pynsted ïa ki kam shna surokbah hapoh ka jylla Meghalaya, ong u Conrad

Shillong, Jylliew 29: Ka Ministry of Road Transport (MoRT) ka la kyntu ïa ka sorkar Meghalaya ban wad ïa ki lad ki lynti ban pynsted ïa ka kam pynïoh jaka na ka bynta ban pyndep ïa ki kam shna surok kham kloi katba lah kumba la khmih lynti da ka tnat.
Ka Ministry ka la pynpaw ïa kane ka jingsngewkhia hadien ba u Myntri Rangbah ka jylla u Conrad K Sangma u la kynduh ïa u Myntri ka sorkar pdeng uba khmih ïa ka tnat Road Transport ha New Delhi.
U Sangma haba kren sha ki lad pathai khubor u la ïathuh ba ha ka jingïakynduh ïa u Myntri ka sorkar pdeng, u la ïoh ban ïakren sani bha ïa kiba bun ki projek kiba dang sahteng hapoh ka Ministry.
“Ka ministry ka la pynpaw ka jingsngewkhia ha kaba ïadei bad ka jingslem ban ïoh jaka kaba long ruh ka daw jong ka jingslem ban lah pyntreikam ïa ki surok kiba bun kum ka Western Bypass kaba la dei ban pyndep noh,” ong u Sangma.
U la ïathuh ba ka ministry ka la pynpaw ba ka la shim khia ha kaba ïadei bad ki kam shna surok bad kumjuh ruh ha kaba ïadei bad ki kam shim jaka na ka bynta ban shna ïa ki surok.
Namar kata u Myntri Rangbah u la kyrpad ïa ki nongshong shnong ban ïatreilang haba ïadei bad ki kam shna ïa ki surok bah kiba dei ki projek kiba kongsan khnang ba ka jylla kan ym duh noh ïa kine ki projek.
Ha ka jingïakynduh bad u Myntri ka sorkar pdeng u Myntri Rangbah u la ïasyllok ruh halor ka projek surok kaba na Lad Umroi shaduh ka surok ban leit sha Jowai, Rattachera bad sha lyndet jong ka Silchar kaba lah poi haduh T. 20,000 klur ka jingmang pisa.
“U Myntri ka tnat Surok u la kyntu ba ïa kine ki kam kiba dangsah watla ki long kiba rit dei ban pyndep noh kham kloi katba lah,” bynrap u Myntri Rangbah.