Kito kiba khmih pyrman bha ïa ka jinglong jingman ha kane ka ri ia kaba ngi la ju tip kum ka ri India naduh shuwa ba ka ioh jinglaitluid na ki phareng, ki kdew ba ka don ka jing i ma ba ka lah ban poi sha ka jingsynshar marwei briew (dictatorship). Suki pa suki kita ki kyndon pynïaid ïa ka ri synshar paidbah (democracy) ki la nang tlor. Kaba phylla ka long ba uba bun balang ha kiwei pat ki jylla um sngew phylla ïa kane ka jingkylla. Man la ka sngi ki don ki jingiatai kiba ïadei bad ka niam ka rukom, ka kolshor bad mynta la thmu ban pynkylla wat ïa ka kyrteng jong ka ri India sha ka Bharat, namar ba kiba bun ki nongshong shnong kane ka ri kiba dei ki Hindu ki sngewkhraw ban khot kyrteng ïa kane ka ri da ka Bharat.
Ha kano kano ruh ka ri haba uno uno u nongsynshar u kwah ban bat ïa ka bor ha la kti marwei u sdang shuwa da kaba pynkylla ïa ka histori jong ka ri. U sdang ban pyndam bad pynduh noh ïa kiei kiei kiba la jia ha myn nymwei bad u pynkhraw jubor ïa ka ri da kaba pynshlur ïa ki heh-paid ba kin thom bor ïa ki rit paid. Kane ka la jia ha Germany ha ki snem 1933 haduh u snem 1945 haba u Hitler u la pyniap noh hi ïalade. U Hitler u pynshongshit ïa ki nong German da kaba ong ba ki la duh noh ka jinglong khraw jong ki namar ki jaidbynriew Jiw kiba kham stad bad kiba lah bha ruh ban pynïaid ïa ki kam khaïi-pateng. Namarkata la shu pynshitom beiñ ïa ki Jiw har rukom. ïa kiba bun lah kem bad thep ha ki patok ha kiba ki shah pynshitom har rukom haduh ba bun na ki ki sngew ba ka bha ba kin iap noh ban ïa kaba shah ïa kita ki jingpynshitom.
U Hitler u dei uwei na kita ki dictator uba kwah ban bat ïa ka bor ha ka kti lajong bad u dei ma u uba pynïaid ïa ki pulit bad ki shipai baroh. Ki leh beit katkum ka hukum jong u. Uno uno uba pyrshah ïa kano kano ka order jong u Hitler ki shah thep phatok beit. Ha kato ka por ym don ki nongpathai khubor kiba nud ban kynthoh ïa u Hitler. Kiba nud ban leh kumta ki shah siat beit.
Haba phai sha ka ri India, ngi imat ba ka don ka jingthmu jong ka seng BJP ban ïai synshar beit khlem da shah ïa kino kino ki diengpyngkiang ba kin pynwit ïa katei ka parti ha ka lynti ïaid jong ka. Ka BJP ka don ïa ka thong ban pynwit bad pynjynjar ïa ki Muslim bad ki Khristan kiba dei na ki niam kiba ym da don bun briew eh ha ka ri India. La bun bah ki nuksa ha kaba ki ïing jong ki Muslim ki la shu shah kyndang da ka bulldozer da kaba ai ki daw har rukom bad kynnoh ba ki taw ïing lane dukan ha ki jaka kiba khlem da ïoh jingbit. Lada long kumta dei ban ïaid katkum ka aiñ bad ym lah ban shu tynrah bad pynpra ïa ki ïing khlem da pyntip ïa kito kiba shong ba sah hangta. Kane ka la jia khamtam eh ha Uttar Pradesh ïa kaba la synshar da ka sorkar BJP bad u myntri rangbah uba dei u sadhu – U Yogi Adityanath.
ïa ki kot histori kiba ngi la juh pule bun bun snem mynta la pynduh pyndam noh ïa kito ki bynta kiba dei shaphang ki nongsynshar Moghul kiba dei ki Muslim kiba la wan hiar thma naduh ki snem 1526 ter ter bad kiba la synshar ïa kane ka ri haduh ban da wan ki phareng ha u snem 1858. Kine ki nongsynshar Moghul kum u Shah Jehan bad Akbar ki long kiba la pyrshang ban synshar bha bad ki la ieh ruh ïa ki jingtei kiba kordor khamtam eh ha Delhi bad Agra. Ki Mughul ki synshar ïa ka ri India haduh 300 snem naduh 1556-1857.
Kumno keiñ yn pyndam noh ïa kane ka bynta jong ka histori kaba kongsan bha ha ka jingïaid lynti jong ka ri India? Hynrei ïa kata lah dep leh bad pynkylla ïa ki lynnong kot histori. La sdang ruh ban kam ba ki jingtip saians baroh ki la don lypa naduh hyndai hynthai shuwa ban wan kita ki Moghul bad ki phareng. Ki jingkam ki long kiba khyllah bah hynrei ym I don mano mano ruh ban pyrshah ïa kine ki jingleh iwei hadien iwei. La shu leh bak bak ïa kita ki jingpynkylla baroh. Lehse ka por kam slem shuh ba wat ïa ki kot khreh jong kiba leit lain doktor (medical science) ruh yn sa pynkylla noh sha ka Hindi. Lada wan kum kata ka apot te ki rit paid na kane ka phang shatei lem mihngi kin shem jingeh shibun lait noh lada baroh kine kiba dang heh dang san ki sdang ban shim ïa ka ktien Hindi kum kawei na ka subjek pule jong ki haduh Class 12.
Hynrei kaba sngewkhia eh ïa ngi kum ka jaidbynriew ka long ba ngim don jingïatai halor kine ki mat ki phang kiba pynshaiong ïangi baroh. Nyngkong eh la ong ban wanrah ïa ka aiñ tang kawei salonsar lane ka uniform civil code (UCC). Nangta la pyrshang sa ban wanrah beit tang kawei ka ktien kren bad bud sa kata ka One Nation, One Election lane ka rynsan kaba pynksan ba dei ban don tang kawei ka elekshon ka dorbar bah parliament lang bad ki jylla, khnang ban duna jinglut. Bad mynta ka jingthmu jong ka sorkar u Modi ka long beit ban pynkylla sa ïa ka kyrteng jong ka ri baroh kawei. Kine ki jingpynkylla kin sa pynmih bun ki jingeh kumba long ha ka por ba pynduh noh ïa ka lut 2000 tyngka. Tip kine kiei kiei kin ïalam shano. Hynrei kum ki rit-paid ngi la dei ban ïamir jingmut lem bad kiwei ki para riewlum ban sngewthuh lada ka jingthmu kaba shadien ka long ban khniot ïa ngi ki rit paid bad ban pynduh lad ïangi.
Ka por ka la poi ban ïa pyrkhat sani bha ïa kine ki dak ki shin kiba I kumba kin ïalam sha ka synshar borbah da uwei u briew (dictatorship).
