Nongpoh, Ïaïong, 25: Ka SOS Children’s Village Shillong kaba don ha Umïam ha ka sngi Thohdieng ka la rakhe ïa ka jingïaid lynti ba 25 snem naduh bala paidbah ïa ka ha u snem 2000 hapdeng shibun ki jingeh jong ka jingïaid lynti ban ïarap ïa ki khynnah kiba shem jynjar bym don nongsumar ne ki khunswet khun rangli.
Ha ka jingrakhe ka jingïaid lynti ba 25 snem jong ka SOSCV, Shillong la shim bynta ruh da u Bah Paul Lyngdoh Myntri ka tnad jngohkai pyrthei ka jylla kum u kongsan, haka jingdonlang u Sumanta Kar CEO, SOS Children’s Village India, ka Anuradha Abrol, CPO, Family Like Care SOS India, u Amar Jyoti Sarmah Village Director ka SOSCV Shillong, ki nongïalam shnong, ki khynnah khunswet lem bad ki nongri nongsumar jong ki.
Haba phai khyndiat ïa ka jingsdang ïa ka SOS Children’s Village, Shillong kaba don ha Umïam, la shu shong tang haka iingwai ha phyllaw jong ka MePDCL kaba don ha Umïam, kaba don tang kumba 40 ngut ki khynnah bad 5 ngut ki kmie kiba sumar ïa ki, hynrei hapdeng shibun ki jingeh bad ki jingtynjuh, ki jingduhthiah duh dem katei ka SOS ka la ïoh laka jong ka jaka ban tei ïa ka iing khunswet, bad mynta ka kyrshan 155 ngut ki khynnah ha 9 tylli ki longïing bad 2 tyli ki Youth Homes.
Ha kine ki snem ba la leit noh, ka SOS Children’s Villages India ka la nang pynheh ïa ki jingai jingïarap ha Shillong, lyngba ka Family Strengthening Programme ka la ai jingkyrshan sha 282 ngut ki khynnah, 523 tylli ki longing kiba la lah ban kyrshan ïalade bad lyngba ka Foster Care Programme ha ka jingïatreilang bad ka Sorkar Meghalaya ka kyrshan 51 ngut ki khynnah. Ka Kinship Care Programme ka kyrshan 25 ngut.
Haba kren ha katei ka sngi u Bah Paul Lyngdoh u la pynpaw ka jingsngewkmen ba wat hapdeng ka jingbunkam u la pynlait khnang ka por ban poi sha katei ka jaka ban ïakynduh bad ki khynnah khunswet kiba la peit bad sumar da ka SOS haka jingïaid lynti ba 25 snem namar une u dei u mawjam ba katei ka jaka sumar ïa ki khunswet ka la ai ka jingshakri kaba bha tam ym tang ïa ka jingim jong ki khynnah bym don shuh ki nongsumar, hynrei wat ïa ka lawei ba phyrnai ka jong ki bad kum ka sorkar kan trei ryngkat ryngkat ban ïarap ïa katei ka jaka sumar khamtam ka jingdonkam jong ki khynnah.
La pynphuh pynphieng ruh ha kane ka sngi da ki jingrwai bad ki jingshad bala shim bynta da ki khunswet kiba sah ha katei ka jaka sumar ryngkat ka jingpynlait ïa ka kot thup sah jingkynmaw jong katei ka shlem.
