Mynta yn tep donburom ïa ka Syiem Bilat
![](https://mawphor.com/wp-content/uploads/2022/09/Ka-syiem-bilat.jpg)
Nailur, 18: Ka jinglehniam ba khatduh ïa ka Syiem Bilat, ka Queen Elizabeth II kan long mynta ka sngi Nyngkong, kata hadien 10 sngi ka jingïam briew ha kylleng ki ri ka pyrthei kiba hap ha ka jingpeit jong katei ka Syiem nalor kiwei kiwei ki Ri.
La antad ruh ba kin don da ki hajar hajar ngut ki paidbah kiban mih sha ki surok jong ka London ban ai khublei khatduh ïa ka met jong ka bad da ki million ngut pat kiban sakhi na ki iing ki sem jong ki ha shwa ba yn tep donburom noh ïa katei ka Nongsynshar kaba slem tam ha ka history jong ka Bilat da ki 70snem 214 sngi.
Kumba 500ngut ki riewkhraw na ki ri ka pyrthei kynthup naduh ka President jong ka India, ka Droupadi Murmu nangta u President kaUS, u Joe Biden kidei ki katto katne ki riewpawkhmat na ki hajar ngut ki nongïalam ba paw ka pyrthei ban shim bynta lang ha katei ka jingai khublei ba khatduh kaban long ha Westminster Abbey kaban sdang ha ka por 11:00 baje mynstep.
Lah ban phaidien, ba ka Queen Elizabeth ka la ring mynsiem khatduh ha Iing Syiem ha Scotland kaba tip kum ka Balmoral Castle ha ka 08tarik Nailur. Ka la don ruh ka jingpynkhreh da ki hajar ngut ki shipai ban peit ha katei ka sngi ban leh niam khatduh khamtam eh ha ka por ba ki pynkit ïa ka met jong ka Syiem na Westminster Abbey sha Wellington Ach. Nangta, da ki hajar ngut pat kin ieng shriak ha surok ha ka por ba ka synduk metïap ka poi ha Windsor, nalor kata la antad ba kin don haduh kumba 10,00 ki heh pulit kiban peit ïa shi lynter ka surok ban ïaid lynti katei ka met.
Ka la don ruh ka jingkhmih lynti ba ka jingpoi ki paidbah sha London mynta ka sngi Nyngkong kan kot beit sha ka shi million ngut. Ha kane ka sngi la buh tam haduh 250 tylli ki rel kit briew na kawei ka jaka sha kawei pat ha katei ka nongbah.
Ïa ka met jong ka yn tep ha King George VI Memorial Chappel ryngkat bad ki kmie ki kpa jong ka, kata u Syiem George VI bad ka Syiem Elizabeth.