Shillong, Naitungt 13: Katba ka lympung ïalehkai Under-20 Fourth Division 2025 ka la jam shakhmat sha ka Pre-Quarter final, ka Shillong Sports Association ha ka sngi Saitjaiñ ka la pynbna ba ki don 18 tylli ki kynhun ki ban ïakhun ha ka Third Division 2025, ka ban sdang naduh kane ka 14 tarik Naitung, sngi Nyngkong.
ïa ki kynhun kiba ïashim bynta la phiah ha ki saw tylli ki Group (A haduh D), ha kaba ka Group A bad B ki don mar san tylli ki kynhun, katba ki ar tylli kiwei pat ki Group ki don mar saw kynhun. Ki jingïalehkai Group stage yn pynlong ha madan First Ground-SSA Stadium, Polo. Ka por ïalehkai na ka bynta ka Third Division kan long 90 minit.
Ki kynhun ha ka Group A ki kynthup ïa ka Sanmer SC, Lawmali Pyllun SC, Madanrting SC, Pomlakrai SC, Nongumlong SC; ka Group B ka kynthup ïa ka Lumparing SC, Rynjah SC, Umlyngka SC, Imson SC, Umrynjah; ka Kharang SC, Iaitylli SC, Gorkha Association, Madan SCC ki hap hapoh ka Group C; bad ki kynhun ha ka Group D ki long ka Mawkriah West SC, Laitlyngkot SC, Lamlynti Madanlyngkhi, Umiew Maw U Sam.
Ki ar tylli ki kynhun kiba kynsai tam na kawei pa kawei ka Group kin ïoh rung sha ka quarterfinal bad ki ar tylli ki kynhun kiba poi sha ka phainal kin shah kyntiew kyrdan sha ka Second Division ha ka samoi ïalehkai ban wan. Ka kynhun kaba wan ha trai duh na kawei pa kawei na ki saw kine ki saw tylli ki Group kin hiar kyrdan sha ka U-20 Fourth Division ha u snem ban wan.
Ka Madanrting, ka Umrynjah, ka Madan SCC bad ka Umiew Maw U Sam ki la kiew kyrdan na ka Fourth Division jong u snem ba la dep, katba ka Imson bad ka Laitlyngkot kidei ki kynhun ba hiar kyrdan na ka Second Division.
Ki kynhun jong ka Group A kin ïoh ban sdang ïa ka jingïalehkai kaba nyngkong jong kane ka lympung mynta ka samoi, ha kaba ka Sawmer SC kan aireng pyrshah ïa ka Lawmali Pyllun SC, ha ka por 10 shiteng mynstep.
