Shillong, Naitung 13: Ka jingïalehkai Group stage jong ka lympung ïalehkai U-20 Fourth Division 2025 jong ka Shillong Sports Association ka la poi sha kaba kut ha ka sngi Saitjaiñ ha kaba ka Mawnianglah ka la ïoh ban buh ïa ka jaka ba khatduh ha ka wat kaba ar hadien ba ka la pynliem ïa ka New Challenger da 2-1 ha ka Group E.
Ha kawei pat ka jingïalehkai, ha kane kajuh ka Group, ka la kut ha ka jingïakhaid da mar 1-1 kol hapdeng ka Krang SC bad ka Iateilang SC.
Shuwa kane ka sngi, ki kynhun ba ïaknieh ïa ka kyrdan ba ar ha kane ka Group ki long ka Mawnianglah, Iateilang bad ka New Challenger.
Haba phai sha ka jingïalehkai, ka New Challenger ka la ïoh ban lamkhmat nyngkong lyngba ka kol kaba la thep da u Wilbert Kharlukhi (28′) hynrei u Bantyngshain Nongsteng (40’+2) u la pynïakhaid na ka bynta ka Mawnianglah shuwa ban kut ka kylla step.
Hadien nangta u Stevenson Nongneng (46′) u la buh hakhmat ïa ka Mawnianglah ha ka kylla miet kaba ki la lah ban bat skhem haduh kaba kut. Kane ka namjop ka la biang pura ïa ka Mawnianglah ban ïoh ïa ka kyrdan ba-ar bad ka jaka ha ka wat ïakhun kaba bud.
Kane ka mut ba ka jingïalehkai kaba ar kam don jingmut shuh hynrei ka Krang ka la pynthikna lypa ïa ka jaka ha ka kyrdan ba nyngkong. Hadien ka jingïakhun kaba khlem thep kol ha ka kylla step, u Nightstar Kharkrang (52’) u la pynkhihjar na ka bynta ka Krang hashwa ba u Wankitbok Kharumnuid (62’) un pynïakhaid na bynta ka Iateilang hadien shiphew minit.
Ka jingïakhun pre-quarterfinal kan kynthup ïa 12 tylli ki kynhun ba kynsai tam kiba la phiah ha ki saw tylli ki thup (pool) kiba don mar lai tylli ki kynhun. Ki ar tylli ki kynhun ba kynsai tam na kine ki pool kin jam sha ka wat ïakhun Quarterfinal.
Ka wat ïakhun kaba ar kan sdang mynta ka sngi ha kaba ka Golflink kan aireng pyrshah ïa ka Laitlulong ha ka por 1 baje mynsngi na ka Pool-1, katba ka Them Rangshken kan ïakhun pyrshah ïa ka Lapalang ha ka por 4 baje janmiet, na ka Pool-2.
