Shillong, Naiwieng 19 : Ka lympung ïalehkai phutbol ba heh duh ha ka pyrthei ka World Cup ba pynïaid da ka Federation Internationale de Football Association (FIFA) mynta u 2022 kan sdang mynta ka sngi U Blei, ha kaba ka Qatar kaba dei ka trai jaka kan aireng pyrshah ïa ka Ecuador ha ka jingïalehkai ha Al Bayt Stadium, Al Khor, Qatar ha ka por 9:30 baje mynmiet.
Ka jingplie pyrda ïa kane ka lympung kan sdang ha ka por 7:30 baje janmiet ha ka por India, ha kaba ka kynhun BTS ne Bangtan Boys ryngkat ka kynhun kin pynlhuh bad pynshongshit ïa ki paidbah nongwan peit kai. BTS lane Bangtan Boys kadei ka kynhun nongrwai ba pawnam bha na South Korea, kiba don ruh shibun ki nongbud ne nongkyrshan na kylleng ka pyrthei bad u Jungkook udei uwei napdeng kiba paw bha ha katei ka kynhun ban sa pynshongshit ïa ki paidbah.
Ka Qatar hapoh ka jingïalam u Felix Ssnchez Bas kum u Head Coach bad ka Ecuador hapoh ka jingïalam u Gustavo Alfaro kiba don ha ka Group A kin sa mih madan ban aireng nyngkong ha kane ka lympung ïalehkai ba mynta u snem bad la khmih lynti ba ka jingïalehkai hapdeng kine ki ar tylli ki ri kan long kaba itynnad bad shongshit bha. Ka Qatar ka don ïa u rangthep kol kynsai jong ka u Almoez Ali uba dang 26 snem ka rta bad uba ïalehkai na ka Al-Duhali SC kaba ïalehkai ha ka Qatar Stars League. Nangata u Abdelkarim Hassan uba dei u rangïalehkai dien bad u Hassan Al-Haydos uba dei u rangïalehkai shakhmat nalor kiwei kiwei.
Haba phai pat sha ka Ecuador, ka don ïa u rangïalehkai ba kynsai kum u u Moises Caicedo bad u Jeremy Sarmiento kiba ïalehkai na ka Brighton ha ka Premier League, Enner Valencia, Michael Estrada, Djorkaeff Reasco, Kevin Rodriguez bad u Moises Caicedo.
Ka Qatar kadei ka ri kaba ïoh rung ha ka sien ba nyngkong eh ha ka FIFA World Cup naduh ba ka la ïoh ka jinglaitluid ha u snem 1971 katba ka Ecuador kadei ka sien kaba saw ba kan mih madan ha ka FIFA World Cup kata naduh u snem 2002 ba ka ïoh ban ïalehkai nyngkong eh kaba la long ha South Korea bad Japan, bud pat ha u snem 2006 ha kaba ha utei u snem ka la rem noh ha ka Round-16 hakhmat ka England bad ha u snem 2010 ha kaba ka la rem noh tang ha ka jingïalehkai group stage.
