Mynta yn rai ki 13 lak ngut ki nongthep vote ïa ka samoi san snem ki 272 ngut ki kyrtong

Shillong, Rymphang, 20: Ka jingïalap elekshon sha ki ar tylli ki Autonomous District Councils (ADC) ha rilum Khasi bad ha rilum Jaiñtia ka la kut noh ha ka sngi Balang bad ha ka sngi Thohdieng ki 13,08,818 lak ngut ki paidbah nongthep vote na rilum Khasi bad Jaiñtia kin sa jied ïa ki nongmihkhmat ba thymmai sha ka KHADC bad ka JHADC napdeng ki 272 ngut ki kyrtong kiba aireng ha kane ka elekshon.
Ha KHADC ki don 158 ngut ki kyrtong ba kynthup ïa ki 146 ngut ki shynrang bad 12 ngut ki kynthei bad ha JHADC ki kyrtong ki don 114 ngut ba kynthup 107 ngut ki shynrang bad 7 ngut ki kynthei. Baroh ki kyrtong ki long 272 ngut ha baroh ar tylli ki Autonomous District Council, kata, 253 ngut ki shynrang bad 19 ngut ki kynthei.
Ka jingñew ïa ki vote kan sa long ha ka 24 tarik mynta u bnai.
Katkum ka jingai jingkheiñ jong ka tnat District Council Affairs jong ka Sorkar Jylla, ha KHADC kaba don 29 tylli ki Constituency ka don 9,96,518 lak ngut ki nongthep vote ba kynthup ïa ki 4,81,268 ngut ki shynrang bad 5,15,247 lak ngut ki kynthei.
Kumjuh ruh ha JHADC kaba don 29 tylli ki Constituency ka don 3,12,300 ngut ki nongthep vote ba kynthup ïa ki 1,51,079 ngut ki shynrang bad 1,61,220 ngut ki kynthei.
Ki don ruh 4 ngut ki nongthep vote Third Gender, kata, 3 ha KHADC bad iwei ha JHADC.
Ki nongtrei Sorkar kiba la shah bynshet ban leit sha ki kamram pynïaid ïa ka elekshon ha ki Polling Station bapher bapher jong ka KHADC bad JHADC khamtam ha ki Polling Station kiba don sha ki jaka ba kham jngai ka leit ka wan ki la mih lypa naduh ka sngi Balang. Sa shi kynhun kiwei pat ki la mih lypa naduh ka por mynstep jong ka sngi Palei ban poi sha ki Polling Station bapher bapher.
U Chief Secretary ka jylla Bah Donald P. Wahlang u la pyntip ba ka Sorkar ka la shong ïa ka jingïalang pyrkhat kam ban pynlong ïa ka elekshon jong ki ar tylli ki Autonomous District Council (ADC) bad pyntip ruh ba u Chief Secretary jong ka Jylla Assam u la kular ban ai ka jingïatreilang ba kan ym don kano kano ka jingshah pynthud jong ki nongtrei Sorkar kiba leit sha ki kamram pynïaid elekshon.
U la pyntip ruh ba ka Sorkar ka la pynbiang ïa ki bor pahara ha ki Polling Station ba la ithuh ba ki lah ban mih ki jingkulmar bad kumjuh ruh ha ki Polling Station kiba don ha ki shnong khappud jong ka jylla Assam bad ka ri Bangladesh khnang ban pynthikna ba ka jingthep vote kan long kaba ïaid beit kumba la thmu.
U Chief Secretary u la kynt ïa ki nongthep vote ba kin mih paidbah ha ka 21 tarik bad ban thep ïa ka vote sha ki kyrtong katkum ka mon ka jong ki.