Mynta yn pyni ïa ka bynta ba 100 jong ka ‘Mann Ki Baat’ u Narendra Modi ha Raj Bhavan, Shillong

Shillong, ïaïong, 29: Katba ka prokram radio kaba man ka bnai jong u Myntri Rangbah duh ka ri ka Mann Ki Baat kan kot sha ka bynta ba 100 jong ka, ka Tnat Information and Broadcasting ka la pynkhreh ban pyni live ïa ka prokram ha baroh ki Raj Bhavan jong ka ri ha ka 30 tarik Ïaïong, 2023. Ha kaba ïadei bad kane ka sienjam, ka Raj Bhavan ha Shillong ka la pynkhreh na ka bynta ban pyni live ïa ka bynta ba 100 jong ka Mann Ki Baat. Ki lad pathai khubor ha Shillong hapoh ka Tnat Information of Broadcasting, ha ka jingïatreilang bad ka Raj Bhavan, kin pynlong ïa ka jingpyni kyrpang ïa kane ka prokram radio kaba pawnam.
U Lat ka jylla Meghalaya, u Phagu Chauhan un plie ïa ka jingïalang kum u kongsan. La khot sngewbha ïa ki riew pawkhmat ha ki bynta bapher bapher bad ki nongmihkhmat paidbah na ka bynta kane ka prokram. La khot sngewbha ruh ïa ki briew na ka jylla kiba la ïoh jingïaroh na ka bynta ki kam jong ki ha ki bynta ba ladep jong ka Mann Ki Baat, ban sakhi ïa ka jingpyni kyrpang ïa ka bynta ba 100 jong kane ka prokram radio.
Ïa ka bynta ba nyngkong jong ka Mann Ki Baat jong u Myntri Rangbah duh la sdang ha ka 3 tarik Risaw 2014 (Sngi Thohdieng) ha ka jingïalang ba kyrpang jong ka Vijayadashami lyngba ka All India Radio (AIR). Naduh u Ïaïong, 2015, la pynmih ïa kane ka prokram radio ha ka sngi U Blei kaba khatduh jong man u bnai. Ka bynta kaba khatduh kaba long ruh ka bynta kaba 99 ka la long ha ka 26 tarik u Lber, 2023. Ha ryngkat ki rynsan ka AIR, la pyni ïa ka da ka Doordarshan ha baroh kawei ka rynsan jong ka. La pyni ruh da ka Doordarshan ïa kane ka prokram ha ka rukom kaba kyrpang na ka bynta kito kiba don jingeh ha ka bor ïohsngew.
Ka bynta kaba nyngkong jong ka Mann Ki Baat ka dei kaba 14 minit bad la kyntiew ïa kane sha ka 19 bad 26 minit ha ka bynta kaba ar bad kaba lai. Ka jingjrong jong kane ka prokram radio ka la long kaba 30 minit naduh ka bynta kaba saw.
Ha kaba sdang, kane ka prokram ka dei tang ha ka ktien Hindi. Hadien kane, la pynmih lang ïa ka prokram ha ka ktien phareng naduh ka 31 tarik u Kyllalyngkot, 2016 bad Sanskrit naduh ka 28 tarik u Jymmang, 2017. Mynta, ka Mann Ki Baat ka dei kaba pynmih ha 23 jait ki ktien kiba kynthup ïa 22 tylli ki ktien ka ri India bad ka ktien phareng bad ruh ha 29 tylli ki ktien tynrai (25 na ka thaiñ Shatei Lammihngi bad 4 tylli na Chhattisgarh) bad ruh ha 11 tylli ki ktien kiba nabar ri.
Ki ktien jong ka India ki kynthup ka Hindi, Sanskrit, Punjabi, Tamil, Telugu, Kannada, Marathi, Gujarati, Malayalam, Odia, Konkani, Nepali, Kashmiri, Dogri, Manipuri, Maithili, Bengali, Assamese, Bodo, Santhali, Urdu bad Sindhi. Ki ktien tynrai ki long ka Chhattisgarhi, Gondi, Halbi, Sargujia, Pahari, Sheena, Gojri, Balti, Ladakhi, Karbi, Khasi, Jaintia, Garo, Nagamese, Hmar, Paite, Thadou, Kabui, Mao, Tangkhul, Nyishi, Adi, Monpa, Ao, Angami, Kokborok, Mizo, Lepcha bad Sikkimese (Bhutia).
Ki ktien French, Chinese, Indonesian, Tibetan, Burmese, Baluchi, Arabic, Pashtu, Persian, Dari bad Swahili ki dei ki ktien nabar ri ba pynmih ïa kane ka prokram
U Myntri Rangbah Duh u la kren shaphang palat 700 ngut ki briew bad kumba 300 ngut ki kynhun haduh mynta ha ka prokram Mann Ki Baat. Kine ki kynthup ïa 37 ngut ki briew bad 10 tylli ki kynhun kiba nabar ri.