Shillong, Jymmang, 18: Ka Khasi Students’ Union, Central Executive Council lyngba ka Education Cell ka la pyntip paidbah ba kan sa pynbna ïa ka result jong ka eksamin UPSC-CSE Scholarship Examination 2022 kaba la long ha ka 14 tarik mynta u bnai ha North Eastern Hill University Arts Cluster Classroom ha ka sngi Palei naduh ka por 6:00 baje janmiet lyngba ka Website jong ka Seng.
Kum ban shu pynkynmaw, ki don baroh 130 ngut ki samla na kylleng ka Bri u Hynñiewtrep kiba la ïakhun ïa kane ka eksamin ba la pynïaid da ka seng.
Ïa ka eksamin, ka seng ka la pynïaid kum shibynta ban jied ïa ki samla ki ban pyntbit ïalade ha ka eksamin Civil Service shabar ka jylla ka ban bei pisa na ka liang jong ka seng.
Ki nongïakhun ïa kane ka ekasamin ki la ruh ban peit ïa ki jubab (Answer key) jong ki kylli katei ka eksamin kaba ladep kaba la pyllait ha Website jong ka seng naduh mynta ka janmiet, ong u kyrwoh ba la phah da u Secretary ka Education Cell u Samla R.Kharjana.
