Shillong, Nailur 12: Ka lympung ïalehkai Basketball kaba la tip da ka ‘Shillong Inter School Basketball Tournament’, ba la pynïaid da ka DUBAKH Sports Pvt. Ltd., kan bteng biang ïa ka kylla kaba ar (Day-2) ha kane ka sngi Saitjaiñ (13 Nailur, 2025) ha Pearly Dew Higher Secondary School Basketball Court.
Kane ka lympung ka thmu ban ai ka lad ban pynroi bad saiñdur ïa ki sap ïalehkai basketball naduh ka kyrdan barit bad ban pynkhreh ïa ki samla na ka bynta ki lympung kiba kham shalor.
Ha ka sngi ba nyngkong (Day-1) kane ka lympung ka ladep pyni ïa ka sap kaba kordor, ka jingshitrhem, bad ka mynsiem ïakhun hapdeng ki nongïalehkai, bad la khmihlynti ba ka kylla kaba ar kan ïaohi ïa kajuh ka mynsiem ïakhun na baroh ki kynhun ba ïashim bynta.
Ka jingïalehkai na ka bynta ka kylla kaba ar kan sdang naduh ka por 8 baje mynstep, ha kaba baroh kin don haduh 7 tylli ki jingïakhun ka ban kut haduh 3 baje nohphai sngi.
Ka prokram ïalehkai ha kane ka sngi (Day 2: 13 tarik Nailur, 2025):
Ha ka por 8 baje mynstep ka jingïakhun kan long hapdeng ka Mizo Modern H.S.S pyrshah ïa ka Jaiaw Presbyterian, nangta ha ka por 9 baje, ka St. Edmunds ISC kan ïakhun pyrshah ïa ka Mawkhar Christian.
Nangta ha ka por 10 baje mynstep, ka SPS kan aireng pyrshah ïa ka Little Flower, bud sa ka jingïakhun ha ka por 11 baje mynsngi hapdeng ka Pearly Dew bad ka Dinet Manik.
Ha ka por 12 baje shiteng sngi ka Mawkhar Christian kan ïalehkai biang sa shi sien pyrshah ïa ka Jaiaw Presbyterian. Ha ka por 2 baje nohphai sngi ka Pearly Dew kan ïakhun pyrshah ïa ka Little Flower.
Ka jingïalehkai kaba khatduh kan long ha ka por 3 baje noh phai sngi hapdeng ka SPS bad ka Dinet Manik.
