Shillong, Naitung 29: Tang hadien ba la pynbna da ka President ka ri ia ki katto katne tylli ki lat ka jylla, na ka liang u Lat ba thymmai ka Meghalaya Chandrashekhar H Vijayashankar un sa bam smai ha ka sngi Ba-ar, ka 30 tarik mynta u bnai ban shimti ïa ka shuki ha Raj Bhavan.
U Vijayashankar un bujli ïa u Lat ba mynta u Phagu Chauhan.
Ka khubor ba la ïoh la ïathuh ba u Myntri Rangbah ka Jylla Conrad K Sangma u la pynduna noh ïa ki sngi ha ka jingleit jong u sha Delhi ban ïakynduh ïa ki Myntri bapher bapher ka Sorkar Pdeng, ban donlang ha ka jingbam smai u Lat ka thymmai.
U Vijayashankar u la shah thung kum u Lat ka Jylla Meghalaya ha ka mied sngi Saitjaiñ ha ka President ka Ri India.
Ka President ka la pynbna ruh ïa ka jingbujli kam ïa ki Lat ka Jylla ha ki 9 tylli ki Jylla bad Union Territories kynthup ha Meghalaya. Kine ki long, 1. Haribhau Kisanrao Bagde kum u Lat ka Rajasthan. 2. Jishnu Dev Varma kum u Lat ka Telangana. 3. Om Prakash Mathur kum u Lat ka Sikkim. 4. Santosh Kumar Gangwar kum u Lat ka Jharkhand. 5. Ramen Deka kum u Lat ka Chhattisgarh. 6. C H Vijayashankar kum u Lat ka Meghalaya. 7. C.P. Radhakrishnan, Lat ka Jharkhand uba khmih lang ïa ka Telangana, ula shah thung kum u Lat ka Maharashtra. 8. Gulab Chand Kataria, Lat ka Assam, ula shah thung kum u Lat ka Punjab bad ruh kum u Administrator ka Chandigarh. 9. Lakshman Prasad Acharya, Lat ka Sikkim, ula shah thung kum u Lat ka Assam bad ïoh khmih lang ruh kum u Lat ka Manipur.
