Mynta yn bam smai u Brigadier Mishra kum u Lat ba thymmai ka jylla

Shillong, Risaw 4 : U Lat jongka jylla Arunachal Pradesh u Brigadier (Dr) BD Mishra un bam smai lashai ka sngi kum u Lat ba thymmai ka jylla Meghalaya ban shimti na u Satya Pal Malik namar ka samoi treikam jong une u Lat ba mynta ka la poi noh shaba kut hi lashai ka sngi hadien ba ka sorkar pdeng ka khlem pynjlan shuh ïa ka por treikam jongu kum u Lat.
Ka kyrwoh na Rashtrapati Bhavan ka la pynpaw ba ka President jongka ri India ka la thung ïa u Brg. (Dr) B.D Mishra (Rtd) uba dei u Lat ka jylla Arunachal Pradesh ban long ruh kum u Lat ka Meghalaya bad u dei ban shimti noh mar mar ïa ka shuki tad haduh ban da pynbeit da kumwei pat.
U Brig. (Dr) B.D Mishra u la shongthait na ka kam shipai jongka ri kum u Brigadier ha ka 31 tarik Naitung 1995 naduh ba u la rung sha kane ka kam kum u Infantry ha ka 17 tarik Nohprah 1961. La kha ïa u ha ka 20 tarik Naitung 1939.
u Dr Mishra u dei u Commander jong ka NSG ( Black Cat Commando), Counter Hijack Task Force bad ha ka jingïakhun bad ki lehnoh ba rah bor ïaka liengsuiñ ka India ( Air India) ha ka 24 tarik Iaiong 1993 na ka kad liengsuin Raja Sansi Airfield, Amritsar, hapoh ka jingïalam jongu la lah ban pyllait im ïa ki nongleit nongwan bad ïoh siat iap ïa ki nongrahbor. U la ïoh ka jingïaroh na u Myntri Rangbah ka ri India halor kane ka jingjop ïa ka jingïakhun ïa ki nongrahbor.
U la don bynta ha kiba bun ki thma, pyrshah ïa ka China ha u 1962, u la ïalam ruh ïa ki shipai pyrshah ïa ki kaikhlaw ha Nagaland naduh 1963-64, pyrshah ïaka Pakistan ha ka Sialkot Sector 1965, ka jingïakhun thma bad ka Pakistan ban ïoh laitluid ka Bangladesh ha u 1971, pyrshah ïaka Pakistan ha LOC Poonch Sector, U la ïalam ruh ia ka Battalion kumu Commander pyrshah ia ki LTTE bad ïa ka Indian Peace Keeping Force ha Jaffna, Vavunia bad Trincomalee, Srilanka naduh 1987-88, ha J&K bad pyrshah ïa ki lehnoh ha Punjab kum u Commander ka NSG Force naduh 1990-1995. Ha ka thma Kargil wat la u la shongthait hynrei u la leit ïakhun da ka mon sngewbha. U la ïoh bun ki khusnam ha kine ki jingshakri jongu.
U la pass ïa ka kyrdan MA na Allahabad University, M.Sc na Madras Univeristy bad Ph.D na Jiwaji University, Gwalior.