Shillong, Rymphang 13: Ka Shillong Lajong FC kan pynkhreh ïa ka jingïakhun hala ïing ban aireng pyrshah ïa ka Sreenidi Deccan FC mynta ka sngi Thohdieng (14 tarik Rymphang) haka I-League, ban long ha madan First Ground – SSA Stadium, Polo. Ka jingïalehkai kan long ha ka por 7 baje janmiet.
Hadien ka jingïakhun kaba jwat bha ban khur ïa ka jingjop pyrshah ïa ka Namdhari FC ha ka jingïalehkai ba khatduh, ka Lajong kan khmihlynti ban bteng ïa ka jingïaid lynti ba paka jong ka mynta ka sngi pyrshah ïa ka Deccan Warriors na Hyderabad.
U Jose Carlos Rodriguez Hevia – Head Coach jong ka Lajong ula pynpaw ka jingshaniah ha ka jingpynkhreh jong ka kynhun bad u kyrmen skhem ba ka kynhun kan ai ïa kaba bha tam ha madan. “Ngi la pynleit jingmut bad pynkhreh bha na ka bynta ka jingïalehkai pyrshah ïa ka Sreenidi Deccan. Ka kynhun jong ngi ka trei shitom bad Ngi long kiba la pynkhreh ban ai ïa kaba bha tam ha kane ka jingïakhun. Man ki jingïalehkai ki long kiba kongsan bad Ngi la raikut ban ïoh ïa ka resol kaba bha,” la ong u Head Coach jong ka Shillong Lajong FC.
Haba phai sha ka miej kamai point, ka Lajong ka shong ha ka kyrdan ba hynriew ryngkat ki 19 point naki 13 tylli ki jingïalehkai, katba ka Sreenidi Deccan ka don ha ka kyrdan ba khyndai ryngkat ki 16 point baka la khur naki 13 sien ïalehkai.
Da kaba shim kabu ïa ka jingkhlaiñ ki nongkyrshan hala ïing ka Lajong kan khmihlynti ban khur shalade baroh lai point na kane ka jingïalehkai bad ban jam kham shakhmat ha ka miej da kaba pynduna 8 point kaba pynïakhlad ïa ka (Lajong) naka Churchill Brothers kaba bat mynta ïa ka kyrdan ba hakhlieh duh da kaba kamai 27 point.
Kane kan dei ruh ka jingïalehkai kaba khatduh ïa ka Lajong hala ïing mynta u Rymphang shuwa ban ïakhun hynriew sien lynter ki jingïalehkai shabar nala ïing. Ki Tiket na bynta kane ka jingïalehkai lah ban ïoh na Electronic Centre (Police Bazaar), Cafe Shillong (Laitumkhrah) & bad ruh mynta ka sngi na SSA Stadium, Polo.
