Shillong, Rymphang 02: Ka long ka kabu ksiar ïa ki khynnah kynthei bad shynrang jong ka jylla Meghalaya kiba ieid bad sngewtynnat ïa ka jingïalehkai phutbol ha kaba kan don ka jingpyrshang jied (trial) ha nongbah Shillong na ka bynta ka AIFF-FIFA Academy ha ki sngi ban wan jong une u bnai. Kane ka jingpyrshang ka plie ïa ki khynnah shynrang bad kynthei jong ka Jylla Meghalaya kiba hap ha ki kyrdan rta ba la buh kyrpang.
ïa kane ka jingpyrshang yn pynlong ha madan Third Ground-MFA Turf, Polo, ban ithuh bad lap ïa ki sap ïalehkai phutbol kiba don jingkyrmen kum shi bynta jong ka jingthmu jong ka India’s Elite Youth Development Pathway.
Na ka bynta ki kynthei, kiba lah ban ïashim bynta ha kane ka jingpyrshang kidei kiba la kha ha u snem 2011 lane 2012, katba ki shynrang kan long ïa kiba la kha ha u snem 2012 lane 2013.
Yn pynlong ïa ka jingpyrshang ha ka 18 tarik Rymphang na ka bynta ki shynrang kiba kha ha u snem 2012, nangta ha ka 19 tarik Rymphang ïa ki shynrang ba la kha ha u snem 2013 bad ha ka 20 tarik Rymphang kan long na ka bynta ki Kynthei (kynthup lang ïa kiba kha ha u snem 2011 bad 2012).
Ban kham pynsting bad ïarap ïa ki nongpynïaid ban thmu bad ban pynlong ïa kane ka trial kaba ryntih, la kyntu jur ïa ki coach bad ki nongïalehkai ba kin pyndap ïa ka phorm pynrung kyrteng kham kloi lyngba ka https://forms.gle/C5oLSAV8unP5i1LG9.
Ka ‘India’s Elite Youth Development Pathway’, kaba kham pynleit jingmut ha ka phutbol, kadei ka sienjam kaba thmu ban saiñdur ïa ki sap ïalehkai naduh tynrai (grassroot) haduh ki kyrdan ïalehkai ba la heh (Professional level). Ka kynthup ïa ki shlem ai jinghikai ba la pynskhem da ka AIFF, ki lympung ïalehkai U13/U15/U18 Youth Leagues, bad ka FIFA Talent Development Schemes (TDS), kaba pynthikna ïa ka rukom treikam kaba ïaid beit, kaba ïahap, bad kaba plie lad ïa ki khynnah shynrang bad kynthei.
