Shillong, Naitung 18: U Myntri Rangbah ka jylla u Conrad K Sangma u la khot ïakren ïa ka kynhun kiba dawa Inner Line Permit (ILP) ha ka sngi Thohdieng hadien ba kitei ki kynhun ki la banjur ban dang pynkhlaiñ ïa ka jingtalasi bad khynra ïa ki nongbylla barjylla ha kylleng ka ri Khasi-Jaiñtia jong ka jylla.
“La bthah ïa nga ban pyntip sha phi ba u Myntri Rangbah ka jylla u la pynpaw ïa ka jingkwah ban khot da ka jingïalang bad katto katne ki dkhot jong ka Union hapoh kamra treikam jong u ha ka 19 tarik mynta u bnai ha ka por 12 baje nohphai sngi,” ong ka Deputy Commissioner jong ka East Khasi Hills ka Kong RM Kurbah ha ka shithi ba la phah sha u General Secretary ka Khasi Students’ Union (KSU) u Bah Donald V Thabah.
Lah ban pynkynmaw ba ka KSU ka la kam ba la don palat 2500 ngut ki nongtrei bar jylla kiba la poi wir kiba khlem don ki kot ki sla kiba biang kiba la shah bat bad kiba la shah beh ha ki 12 sngi ba la leit ha ki jingkhynra bar jylla ka seng.
Ha ka sngi Balang, u President ka KSU u Bah Lambokstarwell Marngar u la pynbna ba ka seng kan nang pynjur ïa ka jingkhynra bar jylla kum ka dak jingpulom jong ka sorkar ban pyntreikam ïa ki aiñ ba la don kum ka Meghalaya Residents Safety and Security Act (MRSSA), 2016 nalor ban pynbor ïa ka sorkar pdeng ban pyntreikam noh mardor ïa ka Inner Line Permit (ILP) ban khang lad na ka jingwan rung beaiñ ki briew kiba nabar jylla.
Katkum ka jingong jong u, ka KSU ka la ong ba shen kan sa ïakynduh bad kiwei pat ki sengbhalang ban shim rai halor kane ka kam khynra mynder bad bar jylla.
“Ngin bteng ban pynjur ïa ki kam khynra nongbylla bar jylla bad ban khmih ruh ïa ki kot ki sla, wat hapdeng ka jingkem jong ki pulit ïa ki dkhot jong ka seng,” ong u Marngar.
“Ki la don palat 2500 ngut ki nongtrei bylla bar jylla kiba la wan sha kane ka jylla khlem ki kot ki sla kiba biang. Ka jingkylli ka mih ruh la kine ki dei ki nongshong shnong ka ri India ne em,” u la ong da kaba bynrap, “Ngi kwah ruh ban tip la katno tylli ki kam ba ka sorkar ka la ujor pyrshah ïa kane ka jingwan beaiñ ki nongtrei bar jylla kiba khlem ki kot ki sla kiba biang, bad kaei ka kam ba la shim pyrshah ïa ki contractor kiba pynkheiñ ïa ki kyndon.”
“Ha ka jingshisha ngi lei ngi kwah ban ïarap ïa ka sorkar ba kan pyntreikam bha ïa ki aiñ ba la don hynrei la kynnoh pynban ba ngi shim ïa ka aiñ ha ki kti lajong. Ka KSU ha ryngkatlang bad kiwei ki seng ngi la hap ban leh hi ïa ka kam khnang ba kan long kum ka jingpynkyndit bynriew ïa ka sorkar jylla,” ong u Bah Marngar.
