Mynta ka sngi yn sdang ka sienjam ba ar jong ka lympung ‘Dubakh Scholastic Basketball League 2026’
SHILLONG, ïaïong 30: Ka sienjam kaba ar (2nd) jong ka lympung ‘Dubakh Scholastic Basketball League 2026’, ba la pynlong da ka DUBAKH SPORTS PVT LTD, ka la khreh ban sdang mynta ka sngi Thohdieng, ka 01 tarik Jymmang, 2026, ha madan Basketball jong ka Pearly Dew School, Jaiaw, Shillong.
Da kaba pynïasoh lang ïa ki khynnah samla kiba tbit ha kane ka jingïalehkai na kylleng ka jylla, kane ka league kan sakhi ïa ka jingïashim bynta jong ki skul bapher bapher, kaba pynlong ïa ka kum kawei na ki lympung basketball kaba shongshit tam ha ka thaiñ.
Ka jingthmu jong kane ka lympung ka long ban ai ïa ka rynsan na ka bynta ki samla pule ha kajuh ka por katba ka dang kyntiew ïa ka jingpynroi ïa ka basketball ha ka jylla. Ka sngi sdang kan sakhi ïa ki jingïalehkai ha baroh ar ki kyrdan jong ki khynnah shynrang bad kynthei ki ban sdang naduh mynstep.
ïa kane ka League la kyrshan da ka DREAM (Driving Result through Education and Mentorship), Vector X (Equipment Partner) by Soccer International Private Limited, DB Fast Food (Food Partner), bad U Matter (Mental Wellness Partner).
Haba ai jingkren shuwa ban jam sha ka sngi ban sdang ïa ka lympung, u Dulon Banjop Kharsati, u Nongseng bad u Head Coach jong ka DUBAKH SPORTS PVT LTD, u la ong: “Kane ka league kam dei tang ka jingïakhun, hynrei ka dei ban tei ïa ka kolshor basketball kaba khlaiñ ha Meghalaya. Ngi sngewkmen ban ïohi ba ki samla ïalehkai ki ïalum lang, ban ïalehkai, bad kiew lyngba kane ka rynsan.”
Kane ka lympung kan ïaid bun sngi, ha kaba la buh por ïa ki jingïalehkai ha ki sngi Saitjaiñ bad ki sngi shuti.