Shillong, Risaw 19: Ka Meghalaya State Olympic Association ryngkat bad ka tnat ba dei khmih ïa ka Sport (Department of Sports & Youth Affairs), jong ka sorkar Meghalaya kan pynlong ïa ka “Sent Off” program ban kitbok bad ai mynsiem khadduh ïa ki nongïalehkai (shynrang bad kynthei) ka Meghalaya (State Athlete) ki ban sa leit ban shimbynta ha ka rynsan ïakhun jong ka National Games, ha Goa naduh ka 25 tarik Risaw haduh 9 tarik u Naiwieng, 2023.
Kane ka prokram ka synjuk kan pynlong mynta ka sngi Thohdieng (20 tarik Risaw, 2023) ha ka por 4 baje janmiet ha State Convention, Hall No. 3 ban lumlang shijaka ïa baroh naduh ki manager\coach. Ha kane ka sngi, u Bah Shakliar Warjri, Myntri jong ka tnat Sports & Youth Affairs ka sorkar jylla un wan kum u kongsan.
Kane ka long katkum ka kyrwoh kaba la pyllait da ki dkhot nongkitkam jong ka Meghalaya State Olympic Association halor kane ka prokram shuwa ba ki nongïalehkai ha ki ban shimbynta ha ki event bapher bapher kin leit ban mihkhmat ïa ka jylla sha katei ka lympung ha Goa.
Haba kyllumlang ïa baroh ki nongïalehkai ki long 45 ngut, katba ki manager\coach ki don 16 ngut, kynthup ruh ïa ki Chef de Mission, Deputy Chef de Mission, ki Staff bad arngut ki Local Media bad baroh ki long 68 ngut.
