Mynta ka jinghikai ban pynkhreh na ka bynta ka jingïada lada khynñiuh jumai bah

Shillong Risaw 11: Ka Meghalaya State Disaster Management Authority kan pynlong ïa ka State Level Mock Exercise ha ka 12 tarik u Risaw naduh ka por 9 baje mynstep ha baroh ki District jong ka jylla Meghalaya.
Kane ka Mock Exercise kan ïasyriem kum ka jingwan lynshop u jumai ba jur ïa ka jylla ha u snem 1897 ha ka ban ïashim bynta da ki bor pynïaid District, ki shipai, ki pulit, NDRF, SDRF, Fire and Emergency Services, Hospitals, skul, college, ki kynhun sengbhalang, ki nongïalam shnong, ki dkhot jongka Bharat Scouts and Guides, Indian Red Cross Society, NSS, Aapda Mitra Volunteers bad kiwei kiwei.
Ki dkhot jongka National Disaster Management Authority kin wan ban don lang ban peit bad khmih ïa ka jingpynlong ïa kane ka Mock Exercise da ka jylla bad ki District.
Namar kane ka Mock Exercise ha kaba ki kynhun bapher bad ki kali Ambulance kin wan ïashim bynta, kumta ka State Disaster Management Authority ka la kyntu ïa ki paidbah ba kim dei ban syier ne sheptieng hynrei ban ai ka jingïatrei lang bad ki jingpynkhreh jong ka sorkar bad ba kin pyrkhat lypa ïa ka leit ka wan ka jongki ban lait na ka jingdheng kali.
Ha Shillong ban sdang ia katei ka Drill, kan don ka jingpynsawa ïa ka siren da u Deputy Controller, Shillong ka ban pyni ba ka don ka jingkynñiuh u jumai bad ka jak ban pynlong iaka Mock Exercise ka dei ha Polo, ka surok na Polo sha Wahingdoh, Polo Super Market, ki dukan kiba don ha kylleng ka thaiñ Polo, Hotel Polo Towers, SBI building, Polo bad MeCEL, Lumjingshai, Samkhamti Petrol Pump, Umkaliar, Female Health Worker, School of Nursing and School of Nursing, TTC, Ganesh Das Government Hospital, Lawmali, St. Xavier’s School, Polo Pynthorumkhrah Golflink Secondary School bad Shillong Secondary School, Forest Colony.
ïa ka Incident Command Post, Medical Camp, Staging area, Relief Camp bad ïa ka Base Camp yn buh ha ka SRGT Parking Lot Polo, bad ka jaka kaba thylli ha ka madan 3rd Ground Polo.