Jowai, Jylliew 11: Ka lympung ïalehkai phutbol ki khynnah skul kaba la tip kum ka ‘District Level Inter School Subroto Mukherjee Cup Football Tournament 2025’ bala pynïaid da ka ophis u District Sports Officer West Jaiñtia Hills District, kala jam noh sha ka jingïakhun Semi Final jong ki khynnah Under-15&17 (Boys) lashai ka sngi 12 tarik u Jylliew ha madan Kiang Nangbah Stadium, Dongmihsngi, Jowai.
Haba phai sha ka jingïakhun Quarter mynta ka sngi Balang haka Under-17 (Boys) ka Kiang Nangbah H/S School kala jop da 5-1 kol ïa ka Mihmyntdu R.C Eve School. Katba ka North Liberty H/S School kala jop da 2-0 kol ïa ka St. Dominic H/S School.
Ha ka jingïakhun Semi Final jong ka Under-17 (Girls) mynta ka sngi ka Kiang Nangbah H/S School kala pynliem da 4-0 kol ïa ka Ummulong Presbyterian H/S School. Katba ka North Liberty H/S School kala jop da 6-0 kol ïa ka H.K Singh Memorial Secondary School.
La pyntip ba ka jingïakhun Semi Final lashai ka sngi 12 tarik ha ka kyrdan Under-15 (Boys) ka St. Dominic H/S School kan ïakhun pyrshah ïa ka H.K. Singh Memorial School bad ka Govt Boys H/S School kan ïakhun pyrshah ia ka Laishnong H/S School.
Ha ka Under-17 (Boys) ka Sawlyngdoh H/S School kan ïakhun pyrshah ïa ka Marian Hills H/S School bad ka Kiang Nangbah H/S School pyrshah ïa ka North Liberty H/S School.
