Nongpoh, Jylliew, 26: Uwei u rangbah u la mynsaw jur na ki bynta jong ka khlieh, ha kaba la kynnoh ba u la hap na kawei ka Scooty kaba u shong, kaba la jia ha ka sngi Baar ha ka suroknah National Highway-6 ha ka thaiñ 15mer Byrnihat ha Ri Bhoi District.
Kane ka long katkum ka tyllong khubor ba la ioh lum na ki Pulit ka Ri Bhoi, la ong ba utei u rangbah u la hap na ka Scooty kaba u shong bad u la mynsaw jur na ka bynta jong ka khlieh bad haduh mynta ki bor pulit kim pat ioh jingtip ïa ka kyrteng jong u ne ka jaka shong jaka sah jong u, namar u Nongniah Scooty u la phet krad ïa lade bad utei u rangbah bym tip kyrteng pat u la mynsaw jur na ki bynta jong ka khlieh.
Halor kane ka jingjia, la ong ruh ba ki Pulit ki la leit marmar sha katei jaka ba la hap utei u rangbah na ka Scooty bad hadien ba la poi ha katei ka jaka la lap shisha ba u la mynsaw hapdeng jong ka surokbah.
Ki Pulit ki la pynkit noh mar mar ïa ka met jong u rangbah ba la mynsaw sha CHC Byrnihat ban ioh ïa ka jingsumar kaba mardor bad ki Pulit ki la pynlong ruh ïa ka jingtohkit ban lap la u nongñiah Scooty uba la iehnoh jyndat ïa u, hadien ba u la hap na ka Scooty.
