Mynsaw jur ka longmie ba kem ding kynsan ka petrol katba dang theh ha mashin otdieng

Shillong, Lber, 08: Kawei ka longkmie kaba la tip kyrteng kum ka kong Melinda Tympuiñ kaba la 38 snem ka rta na ka shnong Risiang West Khasi Hills District, ka la mynsaw jur hadien ba ka petrol kaba dang thmu ban theh ha ka machine ot ding ka la kem ding kynsan ryngkat lang u kurim u Bah Balentin L Marahillong uba la 49 snem ka rta.
Katkum ka jingïathuh u u Bah Balentin, kane ka jingjia ka la jia ha ka 21 tarik, Rymphang 2025 katba ma u bad ka kurim jong u lem bad kawei ka khun ki dang don ha kawei na ki jaka trei lyngkha na ka daw jong ka jingkem ding ka petrol kaba ki dang thmu ban pyndonkam.
Shuh shuh u la ïathuh ruh ba ïa ka petrol kaba ki dang pyrshang ban theh ha ka mashin ot ding kumno re kumno ha ka jingbakla ban pynhoid ïa ka petrol bad namarba ka don ka ding ba meh hajan kumta ka la kem ding ïa ka kurim jong u bad kumjuh ïa u ruh bad lait noh ïa ka khun jong ki.
Ha kane ka jingjia ka kong Melinda Tympuiñ ka la mynsaw jur na ki bynta jong ki kjat kata naduh ka syngkai sharum kumjuh ruh ki kti katba u bah Balentin Marahillong u la shu mynsaw tang malu mala na ki bynta jong ka kjat.
Kaba sngewsih ka long ba hadien kane ka jingjia la ar taiew kynthih ki shu shong bad sumar ha iing katba lah namarba kim don lad ba ban palat ka jingduk hynrei kaba sngewtynnad pat ka long ba la don kawei ka longkmie lem bad ki bahaiing jong ka tang shu ïoh jingtip mar mar ki la leit shaw ban ïalam noh ïa kine ki shikurim kiba la mynsaw sha Civil Hospital Nongstoin ban ïoh jingsumar.