Shillong, Lber, 08: Ka Shnong Mynriang kaba dang hap hapoh ka Mawryngkneng C&RD Block, East Khasi Hills District bad kaba khlain bha ban pynmih ïa u Synsar ka la ai khublei kyrpang ïa ki nongtrei jong ka Horticulture Mawryngkneng Block hapoh ka jingïalam jong u Bah David Nonglait kiba la hiar sha ka shnong Mynriang ban pynshai paidbah sha ki nongrep synsar ha ka 5 tarik mynta u bnai ha kaba ïadei bad ka iew ïadie ïathied ïa u Synsar.
Na ka liang ki Ophisar ki la pynshai ba ka Sorkar kan thied ha ka dor 55 tyngka shi kilo bad tang 800 kilo na uwei pa uwei u nongrep synsar ba ka Sorkar ka lah ban shim bad ka jaka ban leit buh ïa u synsar ka dei hapoh ka shnong Pomlahier bad ha ka shnong Puriang.
Ki nongrep synsar ha kane ka sngi ki la pynpaw ruh ïa ki jingeh shano kin leit die pat ïa u synsar uba tam namarba kawei pa kawei ka longing jong ki nongrep ki kheit ïa u synsar palat ïa ka shi ton shi iing.
Ha kane ka jingpynshai paidbah, ki nongrep synsar ki la kyrpad ïa ka Sorkar ba ladei ban pynkiew noh ïa ka dor bad ban thied lut ïa u synsar ym tang 800 kilo hynrei lymda kumta shaei kin leit die pat ïa u synsar uba tam.
Shuh shuh ki nongrep synshar ki la kyrpad ruh ïa ka Sorkar ba ha ki snem ki ban sa wan kan buh noh da ka jaka thied synsar ha Diengpasoh namarba ka kham jan ïa ki nongrep bad ba ki nongrep synsar ruh ki kham bun na ka shnong Mynriang bad Nonghali.
Ha kane ka sngi, ki ophisar ki la pynshai ruh halor ka CM Assure kaba dei ka skhim ba la mang kyrpang ïa ki nongrep synsar ha kum kane ka por ba hiar ka dor jong u synsar.
Halor kane ka lad jingïarap jong ka Sorkar u Bah J J. Lyngkhoi bad ki nongrep na ka shnong Mynriang ki la ai khublei ïa ki ophisar kiba la shimkhia ïa kane ka jingeh jong ki nongrep ha kane ka samoi.
