Shillong, Risaw 28: Ar ngut ki bar jylla ki la mynsaw jur hadien ba ki la shah thombor da kaba shah kura, shah kyrdem bad shah tied da ki siej teh lama ha ki samla kiba ïa shim bynta ha ka jingïaid rally pyrshah ïa ka jingbym ïohkam ki samla ba la pynlong da ka Federation of Khasi Jantia and Garo People(FKJGP) ha nongbah Shillong ha ka sngi Thohdieng.
U nonglum khubor jong u Mawphor u la sakhi ba ki don bun ngut ki bar jylla kiba la shah tangon ha ki samla kiba ïaid rally kaba la sdang naduh Khyndailad terter shaduh Laitumkhrah.
Ha Khyndailad la sakhi ba ki nongïaid rally ki la ktah kti bad kawut ruh da ki siej teh lama ïa ki bar jylla kiba ñiah scooty bad kiba dang sahkut ha ka dheng kali.
Ynda poi ha IGP Point la sakhi biang ba kane ka kynhun ki nongïaid rally ki la kynjat naphang ïa ki kali bad ki scooty jong ki bar jylla haduh ba ki hap phet krad tang ban lait im ïa lade.
Kane ka jingshah shoh ki bar jylla la sakhi biang ynda poi ha Dhankheti ha kaba ym duna ïa ki san ngut ki la shah tied bad shah kawut jem ha kine ki nongïaid rally kaba ki la khang kdong ruh. La sakhi ba ki don kiba shah ki don kiba la mynsaw jur kiba la shuh thiah lyngktar ha madan ha ka jinglyngkien ka snam na ka jingshah shoh shah kyrdem.
Ym tang ki bar jylla kiba la shah ktah kti ha kane ka sngi hynrei ki arngut ki nongthoh khubor jong u Mawphor bad na Batesi TV ruh ki la ngat ha kane ka apot. Na ka liang u President ka FKJGP u Bah Dundee C Khongsit u la panmap ïa kane ka jingjia bad ong ba ka jingpoi shaduh ka jingshah ktah kti ki nongthoh khubor ka dei namar ki samla ki la dukha mynsiem ha ka jingbym iohkam jong ki.
La sakhi ruh ba kane ka jingïaid paidbah ka la pynlong ïa kawei ka ambulance ba kan sahkut da palat ia ka 10 minit ha ka lad ban rung noh sha Woodland Hospital
Ha kane ka jingïaid rally la ïoh ruh ba da ki bun tylli ki tylli ki kali bad ki ar shaka kiba la shah pynjulor ha kine ki briew katba na ka liang ki pulit ki kylla long tang ki nongpeit kai na kadaw ka jingduna palat ki pulit pahara.
Lah ban kdew ba na ka liang ka FKJGP ha ka jingshisha ka la ai jingtip lupa ïa kane ka jingthmu ïaid rally jong ki hynrei la sakhi pat ba ka jingdon ki bor pahara ka long kaba duna haduh katta katta.
Haba ïadei bad kane ka jingjia u Superintendent of Police (City) u Vivek Syiem u la pyntip ba na ka liang ki Pulit ka Laitumkhrah PS bad Sardar PS ki la ujor da ka Sou Moto pyrshah ïa kito kiba donkti ban shoh bad ktah kti ïa ki nongleit nongwan bad ïa ka jingpynjulor ïa ki kali bad ki dukan ha kane ka sngi.
