“Mynno ngi pynslem” buh jingkylli kylla u Dy.CM ïa ka VPP halor ka jingthung DGP thymmai

Shillong, Risaw 15: U Symbud Myntri Rangbah ka Jylla ba dei peit ïa ka tnad Kam Pohïing ka sorkar jylla, Bah Prestone Tynsong, u la kyntu ïa ka Voice of the People’s Party (VPP) ban wan ïakren markhmat bad ka Sorkar Jylla ban tip kham bniah halor ka jingthung ïa u Director General of Police (DGP) thymmai.
Kane ka jingkren jong u Symbud Myntri Rangbah ka la wan hadien ba ka VPP ka la kynnoh ba ka Union Public Service Commission (UPSC) ka la phah shithi sha ka Sorkar Meghalaya halor ki kyrteng ban thung ïa u DGP thymmai.
Na ka liang u Bah Prestone haba kren halor kane u la ong, “Ka Sorkar Jylla ka long kaba kloi ban kohnguh bad pyntreikam ïa kino kino ki jingbthah kiba wan na ka UPSC ne na ka Ministry of Home Affairs jong ka Sorkar Pdeng”.
Shuh shuh u la ong ruh, “Ha kano kano ka bynta kaba ka UPSC ne ka Ministry of Home Affairs jong ka Sorkar Pdeng ka bthah ïa ngi, ngi kohnguh bad bud ïa ki jingbthah.”
U Bah Prestone u la buh ruh jingkylli ïa ka VPP da kaba ong, “Mynno ngi pynslem?”
U la kyntu ïa ka VPP ba kam dei ban shu pynpaw tang lyngba ki kot khubor ïa ka jingbym hun halor kane ka kam, hynrei ka dei ban wan ïakren markhmat bad ka Sorkar ban sngewthuh ïa ki jingshisha.
“Ai ba kin wan kynduh ïa nga markhmat namar kam ïahap ba kin kren tang ha ki kot khubor halor kane ka mat. Ai ba kin wan ïakren bad nga, ngan batai ïa ki ïa ki jingshisha baroh,” u la ong.