Shillong, Jymmang 13: Ka sorkar jylla ka la mynjur ïa ka jingtyrwa jong ka Executive Committee ka KHADC ba la ïalam da ka VPP na ka bynta ban thung ïa u Bah Mathew Makdoh kum u MDC ba shu sieh ka district council.
“Ngi la ïakynduh ïa u Symbud Myntri Rangbah ka jylla uba khmih ïa ka tnat district council affairs (DCA) u Bah Prestone Tynsong haba ïadei bad kane ka kam bad u la pyntip ïa ngi ba ka sorkar ka la mynjur ïa kane ka jingtyrwa bad shen kan sa pynmih ïa ka jingpynbna ha kaba ïadei bad kane ka kam kumba ka dei ban long,” ïathuh u EM ka KHADC u Bah Powell Sohkhlet sha ki lad pathai khubor ha ka sngi baar.
U la ai khublei ruh ïa ka sorkar MDA ba la ïalam da ka NPP na ka bynta kane ka jingmynjur da kaba ong ba kane ka dei ka kam kaba ym ju kham jia koit.
Katkum ka jingong jong u, bun na kum kine ki jingtyrwa kim ju ïoh ïa ki jingmynjur haba ka don ka jingïapher ha ka sorkar jylla kaba synshar bad kiwei pat ki seng kiba synshar ha district council.
“Ngi ai khublei ïa ka sorkar jylla bad ngi la rai ban ap ïa ka jingpynbna ban sa pynmih ha kaba ïadei bad kane ka kam,” ong u Bah Sohkhlet.
Haba kylli na ka liang jong u EM u la ong, “Lada ka long ha kane ka rukom ngi hap ban buh ka jingkylli ïa ka riti synshar ka ri India, kaba la ong ba dei ban don uwei u dkhot ba shu sieh ha District Council. Kumno yn lah ban ong ba dei ka jingpynsyrwa kai ïa ka pisa haba thung ïa u MDC ba shu sieh naba kane ka ïaid katkum ki kyndon jong ka Sixth Schedule?”
