Shillong, Rymphang 27: Ka jingïalang kynhun Myntri jong ka Sorkar jylla kaba la long ha ka sngi Balang ka la mynjur ïa ka ‘Meghalaya Outstanding Sportspersons Direct Appointment Policy 2025’ kaba thmu ban ïarap bad kyrshan da kaba ai kam sorkar ïa ki nongïalehkai bad ki nongïashim bynta jong ka Jylla kiba jop takma ha ki lympung ïalehkai kiba heh.
Haba pynbna ïa kane ka rai, u Myntri Rangbah ka Jylla u Conrad K Sangma u la ong, “Kumba phi tip ba dang shen Ngi la khur 5 tylli ki takma ha ka National Games bad kumjuh ruh phi tip ba ha u snem 2027 ka Meghalaya kan sa ïoh ban pynlong ïa ka National Games. Kumta khnang ban pynkhreh ïa kane bad ruh ban pynshlur ïa ki khynnah samla jong Ngi bad khamtam ïa ki nongïalehkai bad ki nongïashim bynta jong Ngi, ka Sorkar mynta ka sngi ha ka jingïalang jong ka kynhun myntri ka la mynjur ïa ka Meghalaya Outstanding Sportspersons Direct Appointment Policy 2025.”
Related Posts
“Kane ka mut ba baroh ki nongïalehkai kiba ïoh khur takma na ka bynta ka jylla, ha ka Olympics/Paralympics/Special Olympics, Asian games lane ka Asian para games, CommonWealth, lane ka CommonWealth Para Games, South Asian games National Games. Kumta, man ka por ba ki ïoh khur takma ha kine ki jingïalehkai, Ka sorkar kan ai kam sorkar ïa ki katkum ki takma ba ki ïoh khur,” la ong u Myntri Rangbah.
“Ngi la ïoh ïa ka chart kaba pura na ka bynta kane ba mano bad kiei ki kam kin ïoh bad ka Sorkar kumba Nga la ong ka la rai mynta ka sngi ba shisien ba don kiba jop takma na ka bynta ka jylla tang ha kine ki jingialehkai ba kyrpang, Ngin sa ai ïa ki ïa ka kam sorkar.”
“Nga ngeit skhem ba kane ka rai kan long ka lynti kaba ïalam jngai ha ka ban pynshlur ïa ki nongïalehkai jong Ngi ban trei shitom bad ban leh kham bha ha ka National Games ban wan ka ban pynlong da ka Meghalaya,” u la bynrap.