Mynjur ka sorkar ban thaw ïa ka Search Committree ban wad ïa ki dkhot ba 5 ngut ka Expert Committee ban review ïa ka RP

Shillong, Jylliew 06: Ka sorkar jylla ha ka sngi Ba-ar la la mynjur ban thaw ïa ka Search Committee ne ka komiti ban wad ïa ki riew shemphang ban long ki dkhot jong ka Expert Committee ba ka sorkar ka la thung na bynta ban pynbeit thymmai ne review ïa ka Reservation Policy.
Ha ka jingïakren bad ki lad pathai khubor hadien ba la kut ka jingïalang ka Kynhun Myntri, u Myntri Rangbah ka jylla u Conrad K Sangma u la ïathuh ba ka Kynhun Myntri ka la mynjur ban thaw ïa kane ka komiti kaba kyrpang ban wad ïa ki dkhot ka Expert Committee, ha kaba ïa kane ka komiti u Chief Secretary ka jylla u Bah DP Wahlang un long u khliehduh ka komiti bad yn don arngut ki dkhot ha kaba uwei un dei na ka tnat ki kam aiñ ka sorkar jylla bad uwei pat na ka tnat Personnel.
“Ngi la mynjur ïa kane ka komiti bad ngi la bthah ba kin pyndep kloi katba lah ban wad ïa ki riew shymphang ban long ki dkhot ka Expert Committe, bad ha ka jingïalang ngi la rai ba ha kane ka Expert Committee yn don san ngut ki dkhot kiban ïatai bad ban ai jingmut sha ka sorkar ha kaba ïadei bad ka jingpynkylla thymmai ïa ka Reservation Policy,” u la ong.
Haba kylli la ha kane ka komiti yn thung dkhot ne em kiba na ka jylla, “ka shong beit ha kane ka komiti kaba ngi la thung ban wad mano ban long dkhot,” la jubab u Myntri Rangbah.
Ha kawei pat ka liang, u Myntri Rangbah u la ïathuh ba ka kynhun Myntri ka la mynjur ruh ïa ka Office Memorandum kaba thymmai kaba ïadei bad ka Roster System.
“Ka jingkhot ban aplai kam bad ka jingpynrung kam thymmai ka ha ki tnat ba pher bapher jong ka sorkar jylla kan sdang noh ha kine ki shisngi arsngi ban wan tang shu lah ban pynbna thymmai ïa ka Roster System,” u la ong.
“Ka long kaba eh ban batai bad kaba kyllaiñ ruh ban sngewthuh kumno ka Roster kan treikam hynrei ap shisngi arsngi kan sa mih ka notification bad phin sngewthuh kumno kan treikam,” u la jubab haba kylli la kan treikam sha dien ne shakhmat.
“Ka jingpynkylla thymmai ka dei beit kat kum ka jingai jingmut kaba la tyrwa ha ka jingïalang jong ka komiti ba kynthup jong baroh ki seng saiñ pyrthei,” u la bynrap.
Haba la kylli halor ka jingdawa ka VPP ban pynsahngeh shuwa ïa ka jingkhot aplai kam bad kumjuh ka jingpynrungkam katba ym pat lah ban pynbeit thymmai ïa ka Reservation Policy, u Myntri Rangbah u la ong ba ban shu pynsahngeh beit ïa ka jingpynrungkam thymmai ne recruitment kan ym lah long satia.
“Lada pynsahngeh kiba jynjar ki dei ki samla namar ka rta jong ki kan ïaid katba ka jingpynrungkam pat kan sahngeh bad ki lah ban kynjoh pynban sha ka rta ba kin ym lah shuh ban aplai kam sorkar namar ki la heh than ka rta,’ u la ong.