Shillong, Nailur 20 : Ka ïing Dorbar Lok Sabha ha ka sngi Balang, ka la ai jingmynjur ïa ka Women’s Reservation Bill.
Haduh 454 ngut ki MP kila kyrshan ïa kane ka Bill katba arngut ki MP ki la pyrshah ïa ka.
Kane ka Bill ka pynthikna ïa ka jingbuh bha ba 33 % ïa ki Kynthei ban long ki Dkhot ha Lok Sabha bad ha ki ïingdorbar Thaw Aiñ ka Jylla.
Ka Sorkar National Democratic Alliance (NDA) ba ïalam da ka BJP ka la jer kyrteng ïa kane ka Women’s Reservation Bill kum ka ‘Nari Shakti Vandan Bill’.
Haba kren hapoh Parliament ha ka sngi Ba-ar, u Myntri Rangbah Duh ka Ri Narendra Modi ula ñiew ïa kane ka sngi kum ka sngi sah kynmaw bad kyntu ïa ka Liang Pyrshah ban ïamynjur lang ïa kane ka Bill. Namar ka jingbym lah ka Lok Sabha ban mynjur ïa kane ka Bill la jan 30 snem, u Modi ula ong “Ka jingpynkupbor ïa ki Kynthei lyngba ka jingmynjur ïa kane ka Bill kan nang pynkhlaiñ shuh shuh ïa ka jingsynshar paidbah haka Ri”.
Kane ka Bill, kaba dei ka Constitution (One Hundred and Twenty Eighth Amendment) Bill, 2023, ka kwah ban wanrah ïa lai tylli ki article ba thymmai bad kawei ka clause ba thymmai ha ka Riti Synshar ka Ri. Kane ka clause ka dei ka 239 AA bad ki lai tylli ki Article ki dei ka 330A, 332A bad 334 A.
Kine ki Amendment kin pynthikna ba ki Kynthei kin ïoh ïa ka bhah ba 33 % ha Lok Sabha bad ki ïing Dorbar Thaw Aiñ ha ka General category bad kumjuh ruh ha ka SC bad ST Quota.
