Mynjur ka Kynhun Myntri ïa ka State Mental Health and Social Care Policy, 2022

Shillong, Naiwieng, 29: U Myntri ka tnat ka Koit ka Khiah jong ka Sorkar Jylla u James PK Sangma u la pynpaw ka jingsngewkmen ba ka Kynhun Myntri jong ka Sorkar Jylla ka la ai jingmynjur ïa ka State Mental Health and Social Care Policy, 2022 ïa kaba ladep pynkhreh naduh shi snem mynshwa.
Ha ka jingïakren bad ki lad pathai khubor ha ka sngi Baar, u Sangma u la ong ba ka jingpang ha ka bor pyrkhat ka long kaba donkam bha ha ka tnat ka Koit ka Khiah watla ym shym la shimkhia ïa kane ka mat ha ka rukom kaba dei lane ban buh ïa kano kano ka thong ban ai jingsumar ïa ki briew kiba pang ha ka bor pyrkhat.
“Shibun ki kam bad ki la don ruh ki jingwad bniah, ki jingïasyllok bad mynta ka sngi ngi la lah ban wanrah ïa kane ka Policy sha ka jingïalang Kynhun Myntri bad ban mynjr ïa ka State Mental Health and Social Care Policy,” u la ong.
U Sangma u la ong ba ka jingpang kaba ktah ïa ka bor jabieng ka dei kaba donkam bha ïa ka tnat ka Koit ka Khiah ban shimkhia bad ha ka por ba wan lynshop ka jingpang COVID ki briew ki don hapdeng ka jingdukha mynsiem bad ka jinglyngkhum jingmut bad ki don ruh ki jingjia ba la pynlong ïa ki briew wat ban dkhat jubor ïa la ka jong ka jingim.
U la bynrap ba Mental Health Care Policy ba ka tnat ka la lah ban wanrah dei kaba la pynkhreh da ka Drafting Committee ba la khlieh da u Principal Secretary u Sampath Kumar bad ka Sub-drafting Committee ba la khlieh da ka Dr.Vandana Gopikumar kaba la pynkhreh ïa ka National Mental Health Policy.
Haba pynpaw ba ka jingsumar ïa ki briew don jingpang ha ka bor pyrkhang ka kham rem dor, u Myntri u la ïathuh ba ka Department ka la phaikhmat sha ka MHIS ban pynïoh ïa ka song jingïarap ban ai jingsumar ïa ki nongpang.
Ka Meghalaya Institute of Mental Health and Neurological Science (MIMHANS) bad kiwei kiwei ki jaka ai jingsumar ki dei kiba donkam ïa ka jingkyrshan jong ka Sorkar.
U la ong ba ïa ka District Mental Health Programme la pyntreikam sha baroh ki District bad hadien ka jingwad bniah la ïoh ban lum jingkheiñ ïa kaba la phah sha ka tnat ka Koit ka Khiah.
“Da ka jingwanrah ïa kane ka policy, ngi sa ïoh kham bun ki Data ha kaba ngin sa lah ban ïoh ïa ka jingkheiñ kaba thikna halor ka jingdon jong ki nongpang,”la ong u Sangma.
Kum ban shu pyntip, ka Sorkar ka ladep mynjur ïa ka State Health Policy ha u snem baladep
U la ong ba ka Mental Health Care Policy kaba 70 sla ka thmu ban weng ïa ka jingeh ha kaba ïadei bad ka jingai jingsumar jong ki nongpang khnang ba kan ym ban khia than ïa ki nongpang ha ka por ba ki leit shah sumar.