Shillong, Ïaïong 08: Ka kynhun Myntri ha ka sngi baar ka la mynjur ban pynkylla ïa ka Meghalaya State Language Act, 2005 na ka bynta ban kynthup ïa ka distrik ba thymmai ka Eastern West Khasi Hills ha ka thup jong ka associate official language.
Haba kren sha ki lad pathai khubor hadien ka jingïalang u Myntri Rangbah ka jylla u Conrad K Sangma u la ong, “Katkum ka Meghalaya State Language Act, 2005 na ka bynta ki associate language bapher bapher ha ki district la ka dei ka ktien Khasi ne Garo la shait buh ba kin lah ban ïakren ïa la ka ktien la jong bad la shah ruh ba kin long kum ki associate language bad kumjuh ruh ha ki eksam ba ju pynlong bad ka kyntien kaba donkam ka shong beit halor ka nongrim jong ka associate official language.”
“Naba ngi la don ïa ka district jong ka Eastern West Khasi Hills District kaba thymmai, kumta ka donkam ka jingpynkylla ïa ka associate official language ha Khasi. Ka la don ka jingpynkylla kaba thymmai na ka bynta ban kynthup ïa ka Eastern West Khasi Hills hapoh ka thup,” u la bynrap.
