Shillong, Nailar, 25: Ka Kynhun Myntri jong ka Sorkar Jylla ha ka sngi Thohdieng ka la mynjur ban thung ïa u Secretary bapura jong ka Meghalaya State Council of Technical Education (MSCTE) bad ïa u Executive Chairman jong ka Meghalaya Board of School Education (MBOSE).
Ha ka jingïakren bad ki lad pathai khubor, ka Myntri jong ka Sorkar Jylla ka Dr. Ampareen Lyngdoh ka la ïathuh ba la thung ïa u Secretary bapura jong ka MSCTE da kaba pynshong nongrim ba ki skul Polytechnic ki la don ha ki district, kynthup ha Shillong, Tura bad Jowai bad sa saw tylli kiwei pat kiba yn dang shna thymmai.
“Ka Additional Director ba mynta jong ka Directorate of Higher Technical Education ka A. Ali kan sa shongthait noh shen bad la rai ha ka jingïalang ba kan sa long ka Secretary ba nyngkong eh jong ka MSCTE na ka bynta 24 bnai,” ka la ong.
Ka Myntri ka la pyntip ba ka kynhun Myntri ka la mynjur ban thung ïa u CP Marak, uba long u Indian Forest Officer ba la shong thait kum u Executive Chairman jong ka MBOSE na ka bynta 12 bnai.
Ka la ïathuh ruh ba ka kynhun Myntri ka la pdiang bad mynjur ban pynkylla ïa ka kyrteng jong ka Captain Williamson Sangma Technical University sha ka Captain Williamson Sangma State University.
“Baroh ki tnat treikam ki la ïohi ïa kane ka jingtyrwa bad la sngewdonkam ban wanrah ka jingpynkylla bad ngin sa rah ïa ka Bill ha Ingdorbar Thawaiñ,” ka la bynrap.
Ha kajuh ka por, ka Kynhun Myntri ka la mynjur ïa ka jingpynbeit thymmai ïa ka Meghalaya Judicial Service Rules, 2006 bad ïa ka Meghalaya Higher Judicial Services Rules, 2015.
“Ka jingtyrwa ban pynbeit thymmai ka long ban weng ïa ki kyndon ha ka jingthungkam ïa ki Judicial Officers da ka commission bad hadien ba la wanrah ïa ka jingpynbeit thymmai, ka jingthungkam kan long beit da ka Iingbishar Meghalaya High Court. Shuh shuh, ïa ka kyntien ba paw Gauhati High Court, yn bsut noh da ka kyntien High Court of Meghalaya. Ka jingpynbeit thymmai ka la tyrwa ruh ba pynkylla ïa ka rukom ai kyrdan ïa ki Judicial Officers katkum ka jingbthah jong ka Iingbishar Supreme Court,” ka la ong.
