MYL 2024: Pynkhreh ki khynnah U-14 bad 16 ban ïaknieh burom lahduh mynta ka sngi

Shillong, Risaw 10: Hadien ba la sdang ïa ka naduh u Naitung bad la sakhi ïa ki jingïalehkai kiba itynnat naduh katei ka por, ki khynnah lehkai phutbol ba kynsai jong ka pateng ban wan jong ka jylla ki la long ba la khreh ban ïaknieh ïa ka namlahduh ha ka kyrdan U-14 bad U-16 jong ka Meghalaya Youth League 2024 ba la pynlong ha ka sien ba nyngkong mynta u snem. Baroh ar tylli ki jingïakhun final kin long mynta ka sngi Thohdieng ha SSA Stadium – First Ground, Polo, Shillong, ha kaba ka jingïakhun kaba nyngkong kan long ha ka kyrdan U-14 ha ka por 11 baje mynstep bud sa ka U-16 ha ka por 2 baje mynsngi.
Ka jingïaknieh namlahduh ha ka U-14 kan long hapdeng ka West Jaintia District Sports Association bad ka Nongstoin District Sports Association, katba ha ka U-16 yn sakhi ïa ka Shillong Sports Association ka ban aireng ïa ka Ri-Bhoi District Sports Association.
Kane ka lympung ban kyntiew ïa kin khynnah ka jylla ka dei ba la pynlong da ka Meghalaya Football Association bad la kyrshan ïa ka baroh shilynter da ka Sorkar Jylla (Meghalaya).
Ka la sdang naduh u Naitung ha kaba la ïoh ban pyndep ïa ki wat ïalehkai Group stage ha ki saw tylli ki Zone ha kylleng ka jylla Meghalaya. La pynïalehkai kham bun sien ha ka Sngi Saitjaiñ ha kaba ki la don ruh katto katne ki jingïalehkai ba la hap pynkynriah namar ka jinglong jingman jong ka suiñbneng, lyngba kine ki jingïakhun la sakhi ruh ïa ka jing trei shitom jong ki khynnah ha baroh ar tylli ki kyrdan, kiba la ïakhun tyngeh ban poi sha ka wat ïakhun knockout.
Haba phai sha ka Under-14, dei ha ka round robin ba la sakhi ïa ka jingkhlaiñbor jong ka West Jaintia kaba la synshar hakhliehduh na ka Zone B, da kaba jop baroh phra tylli ki jingïalehkai shuwa ban pynliem ïa ka Pyndengumiong District Sports Association ha ka Quarterfinal lyngba ka tie breaker. Hadien nangta ka la jop biang ha ka tie breaker ban pynkhyllem ïa ka Shillong SA ha ka semifinal ha ka sngi Balang.
Katba ka Nongstoin, ka lahduh na ka Zone D, ka la lah pat ban jop haduh 7 sien, ïakhaid ar sien bad rem shi sien naki 10 sien ïalehkai. Hadien nangta ka la mad ïa ka jingïakhun Quarterfinal kaba jwat pyrshah ïa ka Amlarem Block Sports Association, ha kaba ka Nongstoin ka la jop da 3-2 ha ka extra time. Ha ka Sngi Balang, ka la lah ban pynliem ïa ka Ri-Bhoi DSA da 1-0 kol ban poi sha ka final.
Katba ha ka yrdan U-16, ki kynhun ban ïakhun final, ka Shillong SA bad ka Ri-Bhoi DSA ki la ïakynduh teng ha ka wat ïakhun round robin stage, naba baroh ar ki dei ki kynhun na ka Zone C. Ka Ri-Bhoi ka la bat kyrdan ha khliehduh bad khur 20 point, katba ka Shillong ka la khur 19 point. Bad ka jingïakhun mynshuwa hapdeng jong ki ka la kut ha kaba ka Ri-Bhoi ka la jop da 3-2 kol.
Baroh ar tylli ki kynhun ki la pyni ïa ka jingtbit jong ki ha ka wat ïakhun knockout.
Ka RBDSA ka la pynliem ïa ka North Garo Hills District Sports Association da 5-2 kol ha ka Quarter final bad ïa ka Nongstoin da 3-2 kol ha ka semi, katba ka Shillong ka la pynliem ïa ka Williamnagar District Sports Association da 2-0 ha ka Quarter final bad jop sa ïa ka West Jaintia da 4-1 kol ha ka semifinal.
Kumta ka jingïaid lynti kaba itynnat jong kine ki saw tylli ki kynhun mynta ka la poi sha ka final bad na ka liang jong ka MFA ka la shah sngewbha ïa ka jingrung sha madan kaba laitluid ban pynshlur katba lah ïa kiba haïing hasem, ki paralok bad ki nongkyrshan ban wan ai mynsiem ïa ki khlur ïalehkai ba kynsai jong ka jylla ki ban sa wan.