MWSL: Bteng ka PFR & Mawlum Tyrsad ïa ka jingjop ba paka; pynliem ka Jakrem ïa ka Bright Future
Shillong, Risaw 14: Ka Pay For Right Football Academy bad ka Mawlum Tyrsad SC ki la jop ïa la ki jong ki jong ki jingïalehkai ha ka lympung Meghalaya State Women’s League 2025 ban pynjlan ïa ka jingïakhun khlem shah rem kaba janai jong ki.
Ka PFR ka la jop da ka said ïa ka Attacker’s YC da 1-0 kol ha ka Group A kaba la long ha Shillong hynnin ka Lah sngi U Blei, katba ka Mawlum Tyrsad ka la pynliem noh ïa ka Young SSCC da 2-0 kol ha ka Group B ha kane ka sngi Ba ar. Kumjuh ha ka Group B, ka Jakrem SC ka la pynlong ïa ka Bright Future SSCC ban mad ïa ka namrem kaba nyngkong, da kaba jop da 3-0 kol. Baroh ar tylli ki jingïalehkai ha ka Group B ki la long ha madan ïalehkai jong ka Mawlum Tyrsad.
Hynnin ka sngi, ka jingïalehkai hapdeng ka PFR bad ka Attacker’s YC ka la paw kumba kan poi sha ka jingïakhaid namar ka jingïakhun kaba jur bha bad kaba ïaryngkat bor na baroh arliang, tad haduh ba ka Nisilia Majaw (87’) ka la thep ïa ka kol kaba kongsan tam ha ki minit shuwa ban kut ka jingïalehkai ban ai ïa ka PFR (Shillong Sports Association) baroh 3 poiñ.
Ka long ka resol kaba jwat bha ïa ka Attacker’s YC (Ri-Bhoi District Sports Association) ban pdiang hynrei ki dei pat ban sngew sarong ba ki la ïalehkai katto katne ki phutbol kiba itynnad bad pynlong ïa ka kynhun kaba ha khlieh duh ban shem jingeh. Katba ka PFR ka la kiew sha ka kyrdan ba ha khlieh duh jong ka Group A da kaba kamai 9 poiñ na ki lai tylli ki jingïalehkai.
Ha ka sngi Ba-ar, ka Jakrem (Mawkyrwat DSA) ka la pynliem noh ïa ka Bright Future (Pyndengumiong DSA) lyngba ki kol jong ka Sunalinda Iawren (12′, 56′) bad ka Iaphisha Marbaniang (75′). Kane kadei ka jingshah rem kaba nyngkong na ka bynta ka Bright Future.
Hadien kane, ka Mawlum Tyrsad (Tyrsad Area SA) ka la ïakhun pyrshah ïa ka Young SSCC (Pyndengumiong DSA) bad ka la pynkhihjar lyngba ka H Myrthong (38’) bad ka B Khongsit (90+4’) ban khur ïa ka jingjop kaba lai. Da kaba ïakhaid shi sien, ka Mawlum Tyrsad ka la kamai mynta 10 poiñ bad ka shong ha ka khlieh duh jong ka Group B.