Shillong, Naiwieng 03: Ka Meghalaya Women’s State League 2025 kaba nyngkong eh ka la jam mynta sha ka wat ïakhun QuarterFinal, ha kaba ka jingïalehkai knock-out kaba nyngkong la pynkhreh ban pynlong ha madan First Ground-SSA Stadium, Polo, ha kane ka step sngi Ba-ar hapdeng ka Laitkor SC pyrshah ïa ka Mawten SC. Ka jingïalehkai kan sdang ha ka por 10 baje mynstep.
Katba baroh lai tylli kiwei pat ki jingïakhun Quarterfinal kin long ha ka sngi Balang – Ka Na Rympei Football Academy kan ïakhun pyrshah ïa ka Bright Future SSCC ha ka por 10 baje mynstep, bud sa ka jingïakhun hapdeng ka Pay For Right Football Academy pyrshah ïa ka Mawlum Tyrsad SC ha ka por 1 baje nohphai sngi, bad nangta ka Diengshynrum SC pyrshah ïa ka Jakrem SC ha ka por 4 baje janmiet. Kumjuh ruh, kine ki jingïalehkai kin long ha SSA Stadium.
Ki 27 tylli ki jingïalehkai group stage kiba la pynlong ha ki saw tylli ki jaka – Shillong, Mawlum Tyrsad bad Khliehriat/Laskein – ki la wanrah ïa ka jingïalehkai kaba shongkun bad ki la long ka jingpyni kaba kyrpang ïa ka jingtbit bad ka jinglah jong ki kynthei ha ka jingïalehkai phutbol ha Meghalaya bad ki dang don shibun kiei kiei ki ban dang paw katba kane ka lympung ka dang jam shakhmat sha ka wat ïakhun kaba bud.
Ka jingpynïakap ïa ki kynhun na ka bynta ka Quarterfinal la pynlong da ka Meghalaya Football Association ha ka 01 tarik Naiwieng.
Na ka Group A, kaba don san tylli ki kynhun, ki lai kynhun ba kynsai tam (Top 3) ki la thikna ban ïohrung sha ka knock stage – ka lahduh jong ka Group – ka Laitkor, kaba wan ba-ar – ka Pay For Right (baroh ar na ka Shillong Sports Association) bad kaba wan ba lai – ka Na Rympei (jong ka Ri-Bhoi District Sports Association).
Ka Group B kadei kaba heh tam da hynriew tylli ki kynhun, kumta kiba ïohrung kidei kiba wan ha ka thup kyrdan Top 4. Ka Mawlum Tyrsad (Tyrsad Area SA) ki la long nongjop ha ka Group, ha kaba ka Jakrem (Mawkyrwat DSA) ka la wan ba-ar, ka Bright Future (Pyndengumiong DSA) ha ka kyrdan ba-lai bad ka Mawten (Mawkyrwat DSA) ha ka kyrdan ba-saw.
Ki la don tang ar tylli ki kynhun ha ka Group C – ka Diengshynrum (East Jaiñtia Hills District Football Association) bad ka Chirupheiwi Nongkynrih FC (Laskein Block SA). Dei tang ka kynhun ba ha khlieh duh na kane ka Group kaba la jam shakhmat bad kata ka dei ka Diengshynrum hadien ba la jop baroh arsien, ha la ïing bad shabar.
