MSL: Jop ka Rymbai Iawpynsing SC, Ladthalaboh SC, Mawlai, Mawten, ïakhaid ka Chipakkore FC-Warima YC

Jowai, Jymmang 14 : Ka kynhun ïalehkai jong ka Rymbai Iawpynsing SC bad ka Ladthalaboh SC kila long ki nongjop mynta ka sngi saitjaiñ ha ka lympung ïalehkai phutbol ba la tip kum ka Meghalaya State League (MSL) 2023, Jowai Zone kaba la long ha madan Kiang Nangbah Stadium Jowai.
Haba phai sha ka jingïakhun mynta ka sngi la wan ban ïakhun nyngkong da ka Rymbai Iawpynsin SC East Jaintia kaba la lah ban pynliem da 2-0 kol ïa Youth Club Pdengkarong ASA , ïa kitei ki kol la thep da u Slander Nongtdu ha ka minit ba 5 bad u Vicky Dkhar ha ka minit kaba 26.
Katba ha ka jingïakhun kaba ar ka Ladthalaboh SC kaba pynliem da 5-0 kol ïa ka Seinpynbhalang Laskeiñ DSA. Ïa ki kol la thep da u Think we’ll Bareh ha ka minit ba 4, u Nickyboy Swer ar kol ha ka minit ba 26 & 63 min. u Stephan Pale ha ka minit ba 39 bad u Ebanskem Nongtdeh ha ka minit ba 61.
Ka jingïakhun ha ka sngi nyngkong kan long hapdeng ka Mulait United FC pyrshah ïa ka Youth Club Pdengkarong ha ka por 2 baje shiteng nohphai sngi.
Ha nongbah Shillong ha ka jingïalehkai kaba la long ha madan jong ka Third Ground jong ka MFA, ka Mawlai SC ka la khur jingjop da kaba pynliem da 5-1 pyrshah ïa ka Jyntru, ha kaba u Donlad Diengdoh marwwei u la khyrwit hat-trick (20, 44, 72), katba ïa ki ar kol la thep da u Sanjini Dkhar (28) bad u Remark Kharmalki (78). U Emanbhah Marbaniang u la thep ïa ka shi kol na ka bynta ka Jyntru lyngba ka penalty na ka handball hapoh box jong ka Mawlai.
Katba ha ka jingïalehkai ha Mawkyrwat, ka Mawten SC ka la pynliem ïa ka Pyndengrei SC da 2-1 kaba la khur pura ïa ki lai point ha ka jingïalehkai ha madan jong ka MDSA, katba ha Tura la sakhi ïa ka jingïalehkai kaba ïakhaid hapdeng ka Chipakkore FC bad ka Warima Youth Club da 1-1 ha ka jingïalehkai ha Chandmari Ground.
Ha ka sngi Nyngkong kin don saw tylli ki jingïalehkai jong katei ka lympung MSL ha ki saw tylli ki madan.