Shillong, Kyllalyngkot 06: Ka jingïakhun hapdeng ka Rangdajied United FC – kaba dei ka lahduh ba ïada ïa ka burom bad ka Shillong Lajong FC ka lahduh jong u snem 2019 kan long ka jingïalehkai ban sdang biang ïa ka 4th Meghalaya State League 2024 ynda ka wat ïakhun Quarterfinal kan sdang ha ka 09 tarik Kyllalyngkot, ha kaba kine ki arliang mamla kin ïakynduh ha Wahiajer Sports Complex. Ki jingïalehkai na bynta ka quarterfinal la pynbeit ha ka por 1 baje mynsngi.
Kane ka lympung kaba hehduh jong ka Meghalaya Football Association, la kyrshan da ka Sorkar Jylla Meghalaya, la pynsangeh shipor ha u Naiwieng ban ailad ïa ka por kaba biang na bynta ka kynhun ïalehkai phutbol shynrang jong ka jylla ban pynkhreh ïa ka National Football Championship na bynta ka Santosh Trophy, ha kaba ka Meghalaya ka la khyllem noh ha ka wat ïakhun quarterfinal.
U Tournament Director jong ka MSL 2024, u Dr LL Mawsor, u la pyntip sha baroh 8 tylli ki klob ba dei peit halor katei ka prokram ïakhun Quarterfinal ba la pynbeit.
Hadien ka Quarterfinal kaba nyngkong yn bud sa ar tylli ki jingïalehkai ha ka 11 tarik Kyllalyngkot – kawei hapdeng ar tylli ki kynhun na Jaintia lane ka Jaintia Hills Derby, kata hapdeng ka Sutnga (East Jaintia Hills) bad ka Ladthadlaboh (West Jaintia Hills) ki ban ïakhun pyrshah ha Diengshynrum, Khliehriat. Ha Shillong, ban long ha SSA Stadium, ka Mawlai bad ka Khliehmawlieh kin don ïatyngkhuh biang kumba la jia ha ka semifinal jong ka MSL 2023. (Ka Khliehmawlieh ka la jop ïa ka Mawlai ha u snem ba la dep hynrei ka la shah pynliem noh ha ka jingïakhun final ha ka Rangdajied.)
Ka Quarterfinal kaba saw yn sakhi ïa ka Chipakkore ka ban aireng pyrshah ïa ka Rymbai Shkenshynriah ban pynlong ha PA Sangma Stadium ha Tura ha ka 14 tarik Kyllalyngkot.
Lah ban kdew hangne ki kynhun kiba la bat kyrdan ba nyngkong na ki Group ki long ka Chipakkore (Group A), ka Sutnga (Group B), ka Ladthadlaboh (Group C), ka Rangdajied (Group D), ka Lajong (Group E) bad ka Mawlai (Group F). Katba ka R Shkenshynriah bad ka Khliehmawlieh ki la ïohrung sha ka wat ïakhun knockout kum ki ar tylli ki kynhun kyrdan ba ar kiba kham kynsai na kitei ki hynriew tylli ki Group.
Ka Lajong ka la pynliem teng ïa ka Rangdajied ha ka final jong u snem 2019 ban rah ïa ka trophy ha Khliehriat hynrei ka Rangdajied ka la ïoh ban kput kylla da kaba pynkhyllem ïa ka SLFC ha ka semifinal jong u snem 2023 shuwa ban rah syndon ïa ka trophy ha ka final. Kine ki arliang mamla ki la don ha ka jingïaknieh nam kaba la slem bha shabar jong ka MSL, ha ki lympung ïalehkai jong ka Shillong Sports Association bad ka All India Football Federation bad kumjuh ruh ha ka Durand Cup ha u snem ba la dep. Kumta ka jingïakynduh kaba saw sien hapdeng jong ki ha ka MSL ka kular ban long kawei pat ka jingïalehkai kaba itynnat bad kaba shongkun hapdeng kine ki arliang.
