M’laya Youth League: Yn ïaknieh namlahduh ka West Jaintia bad ka Nongstoin ha ka U-14, ka Shillong bad ka Ri-Bhoi ha ka U-16

Shillong, Risaw 09: Ïa ka semifinal jong ka Meghalaya Youth League 2024 la ïoh ban pyndep ha ka Sngi Palei bad ka jingïaknieh ban ïohrung sha ka final ka long kaba itynnat ha kaba saw tylli ki kynhun jong ki synjuk bapher bapher ki la buh jaka ïalade ha ka final jong ka U-14 bad U-16, ka ban long ha ka Sngi Thohdieng.
Ka jingïaknieh burom lahduh ha ka U-14 kan long hapdeng ka West Jaintia District Sports Association bad ka Nongstoin District Sports Association, katba ha ka thup jong ka U-16 yn sakhi ïa ka Shillong Sports Association ka ban ïatynjuhbor pyrshah ïa ka Ri-Bhoi District Sports Association, ha kaba baroh saw tylli ki kynhun ki angnud ban rah ïa ka khusnam kum ki lahduh jong kane ka lympung, ba la pynlong da ka Meghalaya Football Association ryngkat ka jingkyrshan na ka sorkar Meghalaya.
Ïa ka semifinal ha ka kyrdan U-14 la pynïakhun ha madan MFA Turf ha Polo, bad ka jingïalehkai kaba nyngkong ka la ïakhaid khlem don ba lah pynkhihjar (0-0 kol) haduh kaba kut jong ka 70 minit bad bteng haduh ka extra time, kaba la pynlong ïa ka rai ban jam sha ka jingïashut penalty (tie breaker) ha kaba ka West Jaiñtia DSA ka la jop da 4-3 ban pynkhyllem noh ïa ka Shillong Sports Association.
Hadien kane, ka Nongstoin DSA ka la ïoh ban shad kmen ba jop salit da 1-0 kol ïa ka Ri-Bhoi DSA, lyngba ka kol ba la khyrwit da u Refel Markwius Wanniang (45′ minit) kaba la ïaid lait na ki ksang kti jong u rangapkol ka liang pyrshah.
Ka semi final ha ka kyrdan ki U-16, la pynlong ha Sports Authority of India, kaba ha NEHU, ba la long hapdeng kijuh ki synjuk ïalehkai kiba ïakhun semi final ha ka U-14, hynrei ka resol haba kut jong ki jingïakhun ka ïapher.
Ha kane ka kyrdan ïakhun la sakhi ïa ka Shillong SA kaba la pynliem noh da 4-1 kol ïa ka West Jaintia DSA shuwa ba ka Ri-Bhoi kan khanglad ïa ka Nongstoin da kaba jop 3-2 kol.
Ka jingïakhun kaba nyngkong, ha ka kylla step ym shym la don ba lah ban pynkhihjar. Hynrei ha ka kylla miet ka West Jaintia ka la shah thep haduh lai ha ka Shillong SA, lyngba ki kol na u Iminstar Mawlong (46′ min), Menangpyndap Khongjee (51′ min) bad u Wanpyndap Kharkongor (77′ min).
Ka WJDSA ka la ïohlad ban pynphai shi kol na ka penalty lyngba u Serene Dkhar (90’+1). Shuwa ban kut ka por pynjlan, ka Shillong ka la khylliap syndon ïa ka jingïalehkai da kaba thep ïa ka kol kaba khadduh na ka penalty lyngba u Menangpyndap (90’+5 min).
Katba ka jingïakhun kaba bud, ka jingïalehkai ka la long kaba itynnat bha, ha kaba u Me-u-ba-ai Sumer (9′ minit) u la pynkhihjar na bynta ka Ri-Bhoi tang mar ïasdang shuwa ba u Mickystar Diengdoh (23′ minit) un pynïakhaid na bynta ka Nongstoin.
Hynrei ka jingïakhaid hapdeng kine ki arliang kam shym la neh slem, naba u Prosperwell Ryntong (27′ minit) u la pynlamkhmat biang ïa ka Ri-Bhoi sa shi sien pat. Nangta u Me-u-ba-ai (58′ minit) u la pynkhih ïa ka kol kaba lai ha ka kylla miet. Watla shah tam 2 kol, hynrei ka Nongstoin kam shym la kynrandien bad ïoh pynphia kawei lyngba u Shemborlang Snaitang (85′ minit) hynrei ka RBDSA ka la lah pat ban kyrshan skhem khlem ailad shuh ban shah thep ban khur ïa ka jingjop haduh kaba kut jong ka por.
Hadien ka semi final, kaba dang sah mynta ka long ka wat ïakhun na bynta ka namlahduh, ha kaba baroh ar tylli ki jingïakhun kin long ha ka sngi Thohdieng ha SSA Stadium – First Ground ha Polo. Ka final jong ka U-14 kan dang ha ka por 11 baje mynstep, bud sa ka U-16 Final ha ka por 2 baje nohphaisngi. Ka jingrung kan long kaba laitluid na ka bynta baroh ki nongpeitkai.