Khliehriat, Nailar 22 : Ki nongïalam jong ka party People Democratic Front East Jaiñtia Hills District, mynta ka sngi ki la phah ïa ka shithi iehnoh kam jongki sha u General Secretary PDF Central Body da kaba kynthoh jur halor ka jingbym biang ka jingtreikam ka Central Body ha ri lum Jaintia.
Haba kren sha ki pathai khubor, u bah Albinus Lamurong, uba la bat ruh kum u Secretary jong ka PDF East Jaiñtia Hills District, uba la aireng ruh na ka party PDF ha ka MLA election jong u snem 2018 na Sutnga Saipung Constituency, u la ong ba mynta kane ka party PDF ka la ïaid haduh saw snem ha ri lum Jaiñtia, hynrei ka rukom treikam ka party kam i poi shano shano ruh, na kata ka daw ki la shim ïa kane ka rai ban mih noh na ka party, namar ka jingtreikam ka PDF Central Body kam lah ban pyn urlong ïa ki jingkwah bad jingangnud ki paidbah ka ri lum Jaiñtia bad ong ruh ba kim pat lah ban rai sha kano ka party ba kin leit ban pyniasoh. Ki phra ngut ki nongialam ka PDF East Jaiñtia Hills District kiba la mih noh ki kynthup u Vice President, u bah Shanbor Rymbai, Working President, u bah Sevenmyson Pasleiñ, General Secretary, u bah Albinus Lamurong, Organising Secretary, u bah Shiruphi Tangliang, Assistant Secretary, u bah Emiral Tangliang, Sport Secretary, u bah Jerynemon Suja, u Adviser, u bah Nespecial Latam bad uwei u dkhot, u bah H.Nongsiej.
