Nongpoh, Naiwieng 27: Hadien ka jingpyrshah jong ki paidbah ka thaiñ 12 mer jong 3 tylli ki shnong ba kynthup ïa ka shnong Umpher, Amphanggre, Matchokgre ryngkat ki kynhun sengbhalang bapher bapher ban rah noh ïa ka CTI na Byrnihat bad ban pynkylla ïa ka jaka jong ka Water and Soil Conservation sha ka Industrial Estate, bad hadien ba u MLA ka Jirang u la ai jingmut bad ïakren bad u CM ban rah noh sha Hima Jirang, ka seng FKJGP Western Zone mynta ka sngi ka la mih shakhmat ban pyrshah pat ïa katei ka jingthmu ban rah ïa katei ka Industrial Estate sha Hima Jirang.
Haba kren sha ki pathai khubor u Polosar Mawiong, Assistant Secretary ka FKJGP Western Zone u la ong ba kum ka seng ka dap da ka jingsngewkhia ban iohi haki lad pathai khubor tang hadien ka jingpyrshah jong ki paidbah ka thaiñ Byrnihat, ka la don pat ka jingai jingmut ban rah noh ïa katei ka Industrial Estate sha Hima Jirang.
U la ong ruh ba kum ka seng kam kwah ïa kita ki karkhana kiba pynjaboh ïa ka mei mariang bad kiba ktah ïa ka koit ka khiah ki paidbah, kumba ka Byrnihat mynta ka iohnam kum kawei thaiñ ba jaboh tam haka ri India, hynrei wanrah da ki skul, ki kolej bad kiwei kiwei ki kam pynroi kiba ai jingmyntoi ïa ki khun samla bad ki paidbah.
U la ong ruh ba ka thaiñ Jirang mynta ka don hapdeng ka suk ka saiñ bad ka lyer kaba khuid ba suba, bad lada wan kita ki karkhana kan pynkylla ïa katei ka thaiñ kum kawei na ki jaka ba jaboh bad dei namar katei ka daw ba kum ka seng kam kwah ïa ki karkhana ban wan shna ha katei ka thaiñ bad lada ka sorkar kan shim ïa katei ka rai kum ka seng kan sa shim da kiwei pat ki lad ki lynti kiba tyngeh.
