Shillong, Nailar 29 : U Bah Batskhem Marbañiang ba dei u dkhot ba shitrhem jong ka NPP na Mawsynram constituency ha ka sngi Nyngkong u la pynbna ba un resaiñ noh na katei ka party ban pynkhreh pat ïalade na ka bynta ka elekshon MLA kaban long ha u 2023.
Da kaba kyntait ban ïathuh na kano ka party un ïakhun ha katei ka elekshon, u Bah Batskhem u la ong, “Ha kine ki khyndiat sngi ngin sa pyntip paidbah hynrei ïa mynta hi nga kwah ban pyntip ba nga la mih noh na ka NPP kum u dkhot jong ka party.”U la ïathuh ruh ba katei ka sienjam ba u shim ka long namar um kwah shuh ban shu long tang u nongpeitkai ïa ka khia ka shon jong ki paidbah ka thaiñ hynrei ban long u nongtynrong lang ïa ka lada u paidbah u ibit ïa u ban shimti kum u nongmihkhmat ka thaiñ.
Shwa kane, u Bah Batskhem u la ïathuh ruh ba kum u nongshong shnong ka Mawsynram u la don bynta la slem bha ha ka politik bad u la dep ruh ban ïakhun teng ïa ka elekshon MDC ha u snem 2014 na ka tiket UDP tangba u shah rem noh. U ïathuh ruh ba dei ha shwa ka elekshon MDC ba la dep u la leit ban ïatrei lang bad ka NPP bad trei borbah ban pynjop ïa u MDC ba mynta ka Mawsynram Bah Alvin Sawkmie hadien ba u kyrtong jong ki, Bah PN Syiem u la rem noh ha ka elekshon MLA.
“Kumta, da ka jingïapyrkhat kaba sani bad ki riewrangbah bad ruh ki nongkyrshan nga la rai ban mihshakhmat bad ruh ban aireng ha kane ka elekshon ban wan,” u la ïathuh.
Kumba long haduh mynta, ki kyrtong kiba la tikna ban aireng ki kynthup ïa u MLA ba mynta Bah HM Shangpliang uba la bna ban aireng na BJP, nangta Bah Alvin na NPP, Bah O Suin na ka UDP bad mynta sa u Bah Batskhem uba ïa ka party ym pat tip haduh mynta naei un ïakhun.
