Mih noh u Bah Golden Nonglong na ka seng Congress, ym pat rai eiei
‘Ryngkat ki nongrim ngin rai ryngkat ki paidbah shano ban leit”
![](https://mawphor.com/wp-content/uploads/2023/06/Nonglong-Copy.jpg)
Nongstoiñ, Jylliew, 28: U bah Golden Nonglong u samla rangbah u ba bat ruh kum u Vice President ka All India Professional Congress Meghalaya bad u Secretary ka Meghalaya Pradesh Congress Committee, u ba la long ruh uwei na ki kyrtong u ba la ïakhun kum u MLA na Rambrai Jyrngam konstitwensi, u la iehnoh noh ïa ka seng Congress, namar ka jingbym sngew tynnad ïa ka rai jong ka seng kaba la ailad ïa ki MDC ban ïatreilang ha KHADC.
Ïa kane utei u rangbah u la pynpaw ha ka jingïakren bad ki nongthoh khubor ha ïing sah jong u kaba don ha Nongstoiñ, ha ka jingïadonlang bad ki riew rangbah jong ka seng kynthup ïa u bah Reeboklang Kharbuli working president Siejlieh, bah Albinus Kharjahrin secretary Nongstoiñ Block Congress Committee, bah Sping Kharmashra Zonal president ka Mawduh area bad kiwei kiwei ki riew rangbah ki riew pawkhmat ki bym don party shano shano ruh.
U la ong ruh ba mynne mynstep u la dep ai da ka jingthoh iehnoh kam ha u bah V.H. Pala President rangbah ka party bad ka la long kaba shai hakhmat ka pyrthei ba u la ieh syndon ïa ka party Congress naduh ka 28 tarik u Jylliew 2023.
U la ong ba ki san ngut ki MLA ka seng Congress ha kine ki snem ba la leit, ki la leit ïasoh bad ka sorkar NPP, ha kaba ka party ka la sospon ïa ki. Hynrei lyngngoh ba mynta pat ki leit ban kyrshan ïa ka NPP hapoh ka KHADC, katba ha Assembly ki don ha ka liang pyrshah. U la ong ruh ba na ka liang jong u, um sngew ïahap satïa ïa kane ka jingleh jong ki.
Lah ban kdew hangne ba u Bah Golden Nonglong u dei uwei na ki nongïalam ka Congress u ba kyrshan bha ha ka jingïakhih ïa ka Reservation Policy, kaba la pynkhih da ka seng Voice of the People Party.
U Bah Golden u la ong, “Ngam don kano ka jingpyrshah ïa uno uno u MLA lane MDC jong ka party, hynrei nga ieng halor ka nongrim ba kumno keiñ haba ïa ki san ngut haba ki leit ban kyrshan ïa ka sorkar NPP, la sospon ïa ki. Katba mynta pat ki hynriew ngut jong ngi ki ïatreilang ha KHADC”, bad bynrap “U khynnah rit ruh u sngewthuh ba ka NPP ka ïatrei ryngkat bad ka BJP “.
“Kane ka jingrai bad khamtam ka jingïamynjur lang na ka liang kine ki MDC bad ki nongïalam ba hakhmat ka party, ngam lah satia ban pdiang, namar aiu ngan jubab sha ki paidbah lada ki buh jingkylli ïa nga. Ha ka jingshisha kano kano ka rai ba ngin shim ka dei ban don ka nongrim, hynrei lada ma ngi ki nongïalam jong ka party ngi shna hi ïa kita ki kyndon bad ngi pynkheiñ hi pat, hato haei kata ka nongrim jong ngi kum kita kiba kam ïalade ba ngi ïalam”.
“Ym lah ban pyni ar tylli ki dur da kaba ong hooid shabar bad ong em pat hapoh mynsiem. Na kata ka daw nga la dep ban phah noh ïa ka jingieh noh kam jong nga u ha u President rangbah jong ka party hynne ka step da ka mynsiem jingsngewkhia. Tangba, yn leh kumno ngan hap ban pyrkhat ïa ka nongrim ba nga don”, ong u Bah Golden.
Haba kylli, u Bah Golden Nonglong u la ong ruh, “Ngam pat don kano kano ka rai ban rung sha kano kano ka party. Ngam lah len ba ka la don ka jingpyni, ka la don ka jingïakren na ka liang ki paralok bad khaamtam na ki nongtrei hapoh ka party Congress ruh. Tangba nga la dep kren shai ïa ki ba ngin sa ïa rai ryngkat bad ba ki paidbah kin pynsngew bad batai shano ba ngin leit”.
“Kumjuh ruh ka shong sa ha ka nongrim ka jong nga keiñ, ba haba nga leit sha kano kano ka party, hato ka ïahap ne ym ïahap. Namar lada kano kano ka seng kaba don ïa ki nongrim ki bym ïahap bad ka nongrim jong nga, kamut ka eh than. Ngin sa nang ïa pyrkhat nangne shakhmat ryngkat ki paidbah bad khamtam ba ngan sngewthuh ïalade ïa kita ki nongrim kiba skhem na ka bynta ka Ri bad ka Jaidbynriew”, ong u Bah Golden.