Shillong, K’lyngkot 19: Ki dkhot jong ka HYC hapoh ka jingïalam u Bah Rou Kupar Synrem, mynta ka sngi, ki la mih kyndit kyndit ha surok ban tur ban leit dawa ILP na u Amit Shah, Myntri kam pohïing katba u dang don ha jingialang ka NEC ha State Convention Centre.
Hynrei hamar ba ki poi hajan Civil Hospital, Shillong ki la shah bat noh ha ki Pulit bad Magistrate bad namar kane ka jingshah bat ha ki Pulit ha ka por ba ki thmu ban tur sha Conventoon Centre, ki dkhot ki la shong noh hapdeng surok ban ia hylla bad pyrta ban dawa ILP bad ban pynrung noh ïa ka ktien Khasi ha ka Khyrnit kaba phra.
Ki Pulit ki la ïakhun ban weng jubor ïa ki napdeng surok namar ba la pynsahkut ia ki kali ba ïaid kim shym la lah bad ki la pyrshang ruh ban thep ïa u Bah Roy ha ka Bos, hynrei kim shym la lah.
Hadien katto katne por ki dkhot ki la kynriah noh kham harud surok ha ka jaka ba don u Mot jong u Kiang Nangbah.
Haba ïakren bad ki nongthoh khubor, u Bah Roy u la ong ba kane ka jingmih kyndit jong ka Seng ka long ban pynpaw pyrthei ïa ka jingangnud jong ka ri bad ka jaidbynriew ban pyntreikam noh ïa k ILP bad ban pynrung noh ïa ka Ktien Khasi ha ka Khyrnit kaba phra ha ka riti synshar jong ka ri.
Lah ban kdew hangne ba baroh artylli kine ki mat kidei kiba ka Meghalaya Legislative Assembly ka ladep mynjur lyngba ka Resolution.
Ki dkhot ka HYC ki la ïapra noh na katei ka jaka kham hadien khyndiat por.
