Mih ki paidbah ban kyrshan ïa ka NPP ha Tyrshang, ka ‘Green Signal’ ong u Bah Sniawbhalang

Jowai, Rymphang 18: U National General Secretary ka NPP u Bah Sniawbhalang Dhar uba long ruh u Symbud Myntri Rangbah ka Sorkar Jylla ha ka jingïalap elekshon na ka bynta u kyrtong jong ka Moodymmai-Nongkhroh Constituency u Bah Jesse Suiam kaba la long ha shnong Tyrshang, West Jaiñtia Hills District, u la ong ka jingïashim bynta jong ki paidbah ha kane ka jingialang kaba la long ha ka sngi Baar ban ai jingkyrshan pura ka pyni ïa ka Green Signal ba ka NPP kan jop beit ha kane ka kynti.
U la ong ba ka election MDC mynta u snem ka la long kaba shongshit bha bad kaba kham pher haba ïa nujor bad kiwei ki snem election ba ladep. Kumta ka Party ka don ka jingkyrmen skhem ban ïoh synshar hapoh ka JHADC da ka jingieit thep mynsiem jong ki paidbah nongshong shnong.
U Bah Dhar ula ong naduh u snem 2008 kum u MLA, uno uno u kyrtong uba la pynïeng na kane Constituency ula long beit u nong jop ha manla ki election MDC bad kane ka dei ka jingstad jong ki nongshong shnong ka thaiñ.
U la pynsngew ruh ba kam pher kiba bun kiwei pat ki Party kiba kren beiñ bad kynnoh ïa ka Party NPP namarba ka long ka Sorkar kaba treikam bad buh ruh ka jingkylli lada kwah ïa ka Sorkar kaba khlem shah kren ne shah kynnoh ka dei tang ka sorkar kaba thiah sngi?
Ka NPP ka la synshar 7 snem ïa ka jylla bad ka dei ruh ka party kaba ïadei jingmut ha ka rukom treikam, namar kata “katba dang shah kren, katta ki dang bun ki MLA hapoh ka Sorkar” ong u Bah Dhar.
“Kumba long mynta hapoh ka NPP kam don kano kano ka jingïaknieh longheh bad ka dei ka party kaba peit ïa ka eh ka shon u paidbah,” u la ong bad bynrap, “ha por mynshwa ki Sorkar ki la khyllem tang katto katne bnai na ka jingïaknieh longheh bad ha ka san snem ki la don haduh lai ngut ki Myntri Rangbah.”
Haba kynthoh ïa ka VPP u Bah Sniawbhalang Dhar u la ong, “ka VPP ka tip tang ban kren paidbah hynrei kam tip satia kumno ban trei ïa ki kam. Wat u President jong ka u Bah Ardent ula don ha kiba bun ki Party, ym tip shuh hadien jong kane ka election sa kaei pat ka Party kaba un thaw.”
U la pynsngew ïa ki kam pynroi kiba la wanrah hapoh ka Constituency jong u bad kine baroh la wanrah da ka Sorkar NPP kaba don ruh ïa ka thong ban pynkiew ïa ka jylla hi baroh kawei.
Shuh shuh u la ong ba ha kane ka kynti u kwah ba u MDC uba mynta u Bah Jesse Suiam un jop ha ka sngi ñiew vote ka ban sa long ha ka 24 tarik mynta u bnai.
Da kaba pynkut ïa ka jingkren u la ong ba ka Sorkar NPP ka don ka jingthrang kaba hakhmat eh kata ka long ban shakri na ka bynta ki paidbah ka jylla.