Nongpoh, Jylliew 04: Ki nongshong wai dukan ha Nongpoh Town Shopping Complex mynta ka sngi hapoh ka shatri ka Nongpoh Town Shopping Complex Owner Association ki la mih ryntih lang ban pynkhuid ïa ka iwtung bad ki jaboh jabaiñ kiba la lang bun bnai hapoh katei ka building bad ki sawdong sawkun jong ka.
Ha kane ka sngi la wan ban sakhi lang da u Deputy Commissioner ka Ri Bhoi District u Abhilash Baranwal kum u kongsan haka jingdonlang u Asst. Engineer Urban Affairs Bah SS Langstieh, Pynshai Kharkongngor District VBD Consultant Ri-Bhoi District, Bah Silvestar Mynsong Rangbah Shnong Nongpoh, ha ryngkat ki nongïalam katei ka Association kiba kynthup ïa ka Kong EU Syiem kum ka President, Michelle Marngar Secretary, Bah Pyndaplang Wahlang Adviser lem bad kiwei kiwei.
Kum ban shu kdew hangne ba ka jinglang ki jaboh ka la long kaba shyrkhei hakrum katei ka building kaba la pynlong kum ka jaka pynlang ñiut nalor ka jingsma iwtung kaba mih na katei ka jaka bad haba rung shapoh katei ka building nalor ka jingbun ki dukan kiba shu khang khyrdep, katei ka jaka bad bun ki kyndong kynshrot katei ka building ka la kylla pynban kum ka ktem dih kyiad dih drok, ka jaka bret ñiut bad ka jaka leit paiñkhana ba la isaitmet wat tang ban peit nalor ka biah pathar haki kynroh bad ki mawjingkieng kaba lah ban ktah wat ïa ka koit ka khiah jong ki paidbah.
Na ka liang u Deputy Commissioner haba kren ha katei ka jingïalang u la kitbok ïa kane ka kynhun ba kan dang lah ban leh shibun ki kam ha kaba ïa dei bad katei ka Shopping Complex khamtam ha kaba ïa dei bad ka khuid ka suba kaba long ha khmat eh.
U DC ha katei ka jingïalang u ka pynpaw ruh ba na ka liang ka ophis kan sa nang shim khia shuh shuh ban pynthikna ba kane ka Complex kan itynnad daka jingplie ryntih jong ki dukan hakaba u la pynpaw ruh ba kin sa buh daka kuna ïa kino kino ki trai dukan ki ba khang ïa ki dukan jong ki.
U la bthah ruh ïa ki trai dukan ba kin plie man ka sngi ïa ki dukan jong ki bad pyndonkam hok ruh ïa kane ka Complex bad la bthah ruh ïa kino kino ki nongshong dukan hapoh katei ka Complex kiba shim wai pateng na kiwei pat, ba kin sngewbha ban kynduh ïa ki bor ba dei peit ïa katei ka Complex khnang ba kin ioh ban pynrung ïa ka kyrteng jong ki ba kin ioh long kum ki trai kiba pura jong ka dukan kaba ki shong.
