Nongstoiñ, Jylliew 04: Ha ka sngi balang jong ka taiew, ka Drug Reduction Elimination and Action Mission (DREAM) ka la leit jngoh ïa ka jingtei jong ka Sorkar, ban pynlong jaka sumar lane Rehabilitation Centre ïa kiba kyrni drok ha Nongstoiñ West Khasi Hills.
Ïa ka kynhun la ïalam da u Mission Director ka DREAM u Bah Francis Kharshiïing, ha ka jingdon lang u MLA ka Nongstoiñ u Bah Gabriel Wahlang, Deputy Commissioner ka West Khasi Hills lem bad ki ophisar ka tnad District Social Welfare, District Agriculture, ki dkhot ka Urban Mission, New Nongstoiñ Presbyterian Church bad ki nongïalam shnong.
Ka building ba la dep don lypa jong ka sorkar ka don ha Upper New Nongstoiñ bad ka dei ruh ka thong jong ka Urban Mission jong ka Balang Presbyterian New Nongstoiñ ban ïakhun ïa ka thma drok da ka jingkyrshan ka DREAM.
Na ka liang u MLA ka Nongstoiñ u Bah Gabriel Wahlang, u la ïaroh ïa ka DREAM kaba don ïa ka jingïohi jngai ban don ka jaka sumar lane ka Rehabilitation Centre ha Nongstoiñ ban ïakhun pyrshah ïa ka jingjyllei drok.
U la ong ba kane ka jingïatreilang bad ki kynhun bapher bapher, kan long ka jingkyrkhu ïa ka thaiñ ha ka thma pyrshah drok, khamtam ban sumar ïa kito kiba la ngop ha u drok.
Ka thong ban don jaka sumar lane Rehabilitation Centre jong ka Sorkar ka dei ban pynthikna ba baroh ki ïoh ka lad ban phah sumar ha baroh ki District ka Jylla. Na ka liang u MLA u la ong ruh ba ka jingeit jurip la pyndep, kaba sah ka long ban ai jingtip sha ka sorkar na ka bynta kaba dang sah.
Lah ban kdew hangne ba ka jingleit jurip ka dei kum shi bynta ban bishar ïa ki jingdon jingem ka building, khnang ban pynbha shuh shuh ïa ka jaka sumar.
Ka jingthmu ban buh ïa ka jaka sumar (Rehabilitation Centre) ka dei kaba la ïoh jingkyrshan na baroh kiba don jingkitkhlieh ban pynduh jait ïa drok na ka imlang sahlang bad na ka Jylla baroh kawei.
