Shillong, Nailar, 16: U Myntri Rangbah ka Jylla u Conrad Kongkal Sangma ryngkat bad u Myntri ka tnat Jngohkai Pyrthei u Bah Paul Lyngdoh ha ka sngi Balang ki la plie paidbah ïa ka “The Travellers Nest” ha ka shnong Kyiem kaba don ha Mawphlang, East Khasi Hills District.
Kane ka ‘The Travellers Nest’ ka don san tylli ki iing ba la shna pynwandur itynnat bha bad ka jaka bam na ka bynta ki nongjngohkai pyrthei. Ïa ka ‘The Travelers Nest” la shna da ka jingbei pisa jong ka Meghalaya Age Limited lyngba ka Meghalaya Rural Tourism Cooperative Federation Limited kaba kot haduh 94 lak tyngka.
Ha kane ka sngi, u Myntri Rangbah bad u Myntri ka tnat Jngohkai Pyrthei ki la kaweh lama ruh kum ka jingpyllait paidbah ïa ki phra tylli ki kali Prime Tourism Vehicles.
Haba kren ha kane ka jingïalang, u Myntri Rangbah u la ong, kane kan long kum u mawjam jong ka jingtrei shitom ka Sorkar ban ïatreilang bad ki shnong ki thaw ban kyntiew ïa ki kam jngohkai pyrthei.
“Ka bor jong ngi ka shong ha ka jingïatreilang jong ki shnong ki thaw, ïa kiba ngin khynñiat shakhmat ïa ka khih ka kamai,” u la ong.
“Ka Jylla Meghalaya kan ym lah satia ban kiew shajrong da kaba sahdien. Manla kawei pa kawei ka kynhun ka don la ka jong ka thong ban trei, bad ban ithuh ïa kine ki jingtrei da kaba buh hakhmat eh ïa ka jingthmu ban kynjoh sha ka thong,” ong u Sangma.
U la ong ruh ba ka Sorkar ka la pyrshang ban kyntiew ïa ka Jylla Meghalaya da kaba pynkha haduh shi lak tylli ki kam ha ka tnat Jngohkai Pyrthei da ka jingïatreilang jong ki kynhun bapher bapher.
U la ïathuh ruh ba ka thong kaba kongsan jong ki nongsengkam ka long ba ki dei ban pyntyllun shakhmat ïa ka roi ka par jong ka jylla bad ïathuh bniah halor ka CM Elevate Programme ba la pyllait thymmai.
Hapoh ka Chief Minister’s Elevate program, Government ka Sorkar ka la ai jingkyrshan naduh 30% haduh 75% na ka bynta ki projek ba la pynsdang da ki nongseng kam bapher bapher, ki Self-help Group bad kiwei kiwei ki kynhun.
U Sangma u la pyntip ba ka thong jong kane ka prokram ka long ban pynthymmai ïa ka khih ka kamai lyngba ki jingpynsdang ïa ki kam bapher bapher, naduh ki cinema halls haduh ki jaka ai jingsumar bad ki projek jngokai pyrthei.
U la pyntip ruh ba ka surok ba la shna pynbna naduh Mawphlang sha Weiloi ka dei ka sakhi jong ka Sorkar ban pynbha ïa ki surok ha kylleng ka jylla.
