Jowai, Naiwieng 15: Ka West Jaiñtia Hills District Asha Association (WJHDSA) hapoh ka Meghalaya Asha Workers Union (MAWU) mynta ka sngi ba ar (Tuesday) kila pynlong syndon da ka jingïaid rally kaba la sdang na madan jong ka Tympang Club bad ïaid lyngba ka Iawmusiang haduh madan dai masi Ladthadlaboh ha ryngkat ki pla card bad ki jingpyrta pynrem ïa ka sorkar MDA.
Kane ka jingïaid rally da kitei ki nongtrei Asha ka West Jaiñtia Hills ka long shi bynta ban pynsngew sha ka sorkar halor ka jingsiew ïa ka bainong kaba T.2000/- tyngka bad lada kheiñ haka shisngi ka long tang 66 tyngka bad kane ka jingsiew jong ka sorkar kam ïahap shuh ha kum kine ki por jong ka jingdawa.
La ïathuh ïa kane ka rally la pynlong ha kylleng ki District jong ka jylla, khnang ba ka sorkar kan shah skhor ïa kane ka jingdawa kaba kyrkieh ki nongtrei Asha.
Ha madan dai masi la pynlong ïa ka jingïalang bala pynïaid da ka kong Wansadaka Pariat, shuh shuh la pynsngew ba ki nongtrei Asha hapoh ka jylla kila sangeh ban treikam naduh ka 6 tarik mynta u bnai, kum ka dak ban dawa ïa ka sorkar ba kan kyntiew noh ïa katei ka bainong jong ki.
Na ka liang ka President jong ka MAWU ka kong M. June Myrching haba kren ha kane ka sngi kala ong “ka sorkar kam don hok ban hukum ïa ngi ki nongtrei Asha, lada phi dei ka kmie kaba kit khia ïaki jingdonkam jong ki khun phi don hok ban hukum”. da kaba ong ruh ba ka sorkar kam sngap satia ïa ka jingthngan jong ka kpoh kum ki nongtrei Asha.
Kala kynthoh ruh ïa ka myntri jong ka koit ka khiah ka sorkar jylla kaba la kyntu ïaki nongtrei Asha ban leit trei khlem kino kino ki jingsiew kiba biang bad kumjuh halor ka jingong u Join Secretary ka Health & Family Welfare u TG Momin uba la pynngew ba ka sorkar kala pyllait pisa ha ka jinglut kaba 31.89 klur naduh u bnai Risaw 2022, nangta kumba 34.50 klur tyngka ha kine ki 18 bnai bala dep, uba la ong ruh don kiba ïoh 7 haduh 8 hajar tyngka ka bainong bad kane kam long satia kumta, ong katei ka President.
Kala ong ha kaba ïadei bad u Apps ‘Asha First’ kala buh jingeh ïa ki nongtrei Asha ban pyndonkam na ka bynta ban ïoh ïa kita ki incentive bapher bapher bad ka bym lah satia ban pynhuh ïa ki nongtrei Asha, kala ong ruh ba ka sorkar mynta kala sdang ban pynïaleh thma pynban ïa ki Asha bad ki Anganwadi.
Na ka liang ka President jong ka MAWU ka kong M. June Myrching kala kren shai baka ka Meghalaya Asha Workers Union (MAWU) kan ym pyndem da lei lei tad haduh ba ka sorkar kan ai jingpynhun ïa ki jingdawa jong ki Nongtrei Asha.
