Shillong, Rymphang 09: Ka Garoland State Movement Committee (GSMC) bad ka A’chik State People’s Front ka la kyrpad biang ïa u Myntri Rangbah ka jylla u Conrad K Sangma ban pynlong ïa ka Tura kum ka nongbah Tlang ne Winter Capital jong ka Meghalaya.
Ha ka dorkhas ba la ai lang sha u Myntri Rangbah, ka GSMC ka la ong ba kane ym tang ba kan long ka jingïarap ban pynïoh ïa ki jingdawa ba la sahteng lah slem jong ka kynhun riewlum A’chik hynrei kan pynkhlaiñ ruh ïa ki jingtreikam ka sorkar jylla.
Haba phai sha ka jingpynbna jong u Myntri Rangbah ka jylla Assam u Himanta Biswa Sarma, ha ka jingrakhe ïa ka Republic Day ba u la ong ba ka Tezpur kan shakri noh kum ka Raj Bhawan, katba ka sor Silchar kum ka mini-secretariat bad ba kan don ruh ka ophis u Chief Secretary, ka GSMC ka la ong, “Kane ka jingleh ka pynïasoh bad ka jingkiew ka ri India bad ki jylla ban thaw la ka jong ka administrative bad ki jingtreikam ka executive ban pynïar ïa ka jingtreikam ki tnat sorkar bad ka jingïoh lad ki paidbah ban ïajan bad ka sorkar.”
Kane ka kynhun ka la ong ruh ba ka Tura, ka don sha ki bynta ba sha sepngi jong ka Meghalaya, kumta ka long ka jaka kaba biang na ka bynta ban pynlong kum ka nongbah ka Tlang bad ka long ruh kaba kloi ban ai ki jingkyrshan haba ïadei bad ki kam jingtei kiba donkam.
Haba kdew ba ki la don bun ki jylla hapoh ka ri India kiba la buh bun ki ophis secretariat bad Raj Bhawan ban lah ban pynbiang ïa ki jingdonkam jong ki thaiñ, kane ka kynhun ka la ong ba ka Tura kaba long pdeng jong ki kolshor bad ka khana pateng jong ki Garo Hills, ka long kaba biang bha ban pynurlong ïa kane ka jingdawa.
Kine ki kynhun ki la ong shuh shuh ba u Myntri Rangbah bad ka kynhun myntri sorkar ki dei ban peit ïa ka jingïabiang lang bad ka jingwanrah ïa ki kam pynroi kiba ïa ryngkat bad ban pynthikna ïa ki jingtreikam ki tnat sorkar kin long kaba bha bad ban kyntiew ruh ïa ka ïoh ka kot, ka bha ka miat jong ki nongshong shnong ka Meghalaya.
