Shillong, K’Lyngkot 03: Ka Deputy Commissioner ka East Khasi Hills District ka Kong R M Kurbah ka la pynjari da ka kyndon 163 BNSS ha kaba ïadei bad ka jingkajia hapdeng ki ar kynhun jong ka Balang Presbyterian ha Ksehpyndeng kaba dang hab hapoh ka Mawryngkneng Police Station.
Ka DC ka la ong ba la ïoh jingtip ba kawei ka kynhun kaba thymmai jong ka Balang ka don ka jingthmu ban pynbaptist biang ïa ki tymmen ki san jong kane ka shnong ha ka sngi u Blei ban wan, ha kaba ïa kane pat la pyrshah jur da kawei pat ka kynhun.
Kumta halor kane lada shah ne ailad ïa kane ka jingleh kan lah ban nang pynklang ïa ka jingïashrut hapdeng jong ki bad ka lah pat ban wanrah ïa ka jingma ha ka shongsuk shongsaiñ, kumta la sngew ba ka long kaba kongsan ban pynjari noh da ka kyndon 163 ka BNSS.
“Katkum ka bor ba la pynkup hapoh ka kyndon 163 BNSS nga la khang pyrshah ïa kano kano ka jingïalang ne ïalum lang ha kane ka jaka kaba don ka jingïakajia, bad ka jingpynkheiñ ïa kane ka hukum kin shah pynshitom hapoh ka kyndon 223 jong ka BNS,” ong ka DC ha ka hukum.
